Jaqyn týystardyń zeınetaqy jınaǵyn emdelýge jumsaýǵa bolady
«Ony alý úshin azamat BJZQ-nyń ınternet-resýrsy nemese «elektrondyq úkimet» veb-portaly arqyly birjolǵy zeınetaqy tóleminiń qoljetimdi somasyn anyqtaýy qajet. Eger qordaǵy soma jetkilikti bolsa, onda azamat tirkelgen jeri boıynsha medıtsınalyq uıymǵa júginip, dárigerlik komıssııanyń birjolǵy zeınetaqy tólemderi esebinen emdelýge jiberý týraly qorytyndysyn alýy qajet», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń túsindirýinshe, dárigerlik komıssııa ótinish bergen kúnnen bastap 5 jumys kúninen keshiktirmeı zeınetaqy tólemderi esebinen emdelýge jiberý týraly ne medıtsınalyq kórsetkish bolmaǵan jaǵdaıda bas tartý týraly sheshim qabyldaıdy. Qorytyndy dárigerlik komıssııanyń otyrysy ótkizilgen kúnnen bastap 2 jumys kúni ishinde beriledi.
Jınaqtalǵan zeınetaqy qarajaty esebinen azamattar orfandyq aýrýlardy emdeý, Qazaqstan Respýblıkasynyń aýmaǵynda ornalasqan medıtsınalyq uıymdarda kórsetiletin stomatologııalyq qyzmetter (tisti protezdeý, ımplantatsııa), operatsııadan keıingi tyrtyqtar men týa bitken aqaýlardy túzetý maqsatynda rekonstrýktıvti jáne qalpyna keltirý operatsııalary (plastıkalyq), sondaı-aq mastektomııa, radıonýklıdtik jáne radıoıodterapııa, radıohırýrgııalyq emdeý (gamma-pyshaq, kıber pyshaq), protondy terapııa, oftalmologııalyq qyzmetter sııaqty qymbat turatyn qyzmetterdi ala alady. Sonymen qatar, atalǵan tizbe halyqtyń qajettiligin eskere otyryp, ózgerýi múmkin.
Medıtsınalyq komıssııanyń oń qorytyndysy bolǵan jaǵdaıda ótinish berýshi medıtsınalyq uıymdy tańdap, shart jasasýy qajet. Sodan keıin, ETsQ kómegimen ýákiletti operatordyń ınternet-resýrsynda óziniń jeke kabınetin ashý, onda somasyn, paıdalaný maqsatyn kórsete otyryp, birjolǵy zeınetaqy tólemine elektrondyq ótinishti toltyrý, dárigerlik komıssııa qorytyndysynyń skanerlengen kóshirmelerin, medıtsınalyq uıymmen emdeý týraly shartty bekitý jáne óziniń ETsQ-men kýálandyrý qajet. Ótinish berýshiniń ETsQ-sy qoıylǵan, ýákiletti operatorda tirkelgen Tólemge arnalǵan ótinish týraly málimetter BJZQ-ǵa elektrondyq habarlama sheńberinde kelip túsedi. BJZQ ýákiletti operatordan elektrondyq habarlama alǵan kúnnen bastap 5 jumys kúni ishinde birjolǵy zeınetaqy tóleminiń somasyn ótinish berýshiniń ýákiletti operatorda ashylǵan arnaıy shotyna aýdarady.
Ýákiletti operator alýshy usynǵan birjolǵy zeınetaqy tólemderiniń nysanaly maqsaty boıynsha qujattardy tekseredi jáne olar sáıkes kelgen jaǵdaıda olardy alǵan kúnnen bastap 5 jumys kúni ishinde ótinish berýshi tańdaǵan medıtsınalyq uıymnyń nysanaly maqsaty boıynsha qarajatty aýdarady.
«Sondaı-aq, jubaıynyń (zaıybynyń), jaqyn týystarynyń birjolǵy zeınetaqy tólemderin emdeýge paıdalanýǵa bolatynyn atap ótkim keledi. Mundaı jaǵdaılarda taraptar jeke kabınette týystyq qatynastardy rastaıtyn qujattardy qosa kórsetip, olardyń ETsQ-men kýálandyrylatyn birjolǵy zeınetaqy tólemderin berý týraly kelisim jasasady», - dedi G.Sársenbaeva.
Eske salsaq, 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.
Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi. Sonymen qatar Zeınetaqyny paıdalaný boıynsha medıtsınalyq qyzmetterdiń tizimi bekitildi.