Jaqyn arada uıaly baılanys qyzmetiniń tarıfteri tómendetiletin bolady - QR Baılanys jáne aqparat mınıstrligi
ASTANA. Shildeniń 16-sy. QazAqparat - Qazaqstan Respýblıkasy Baılanys jáne aqparat mınıstri Asqar Jumaǵalıev Baılanys operatorlarynyń keńesi ókilderimen kezekti májilisin ótkizdi. Májiliske qatysqandardyń qatarynda Qazaqstan telekommýnıkatsııalyq qaýymdastyǵy, «Qazaqtelekom» AQ, «Transtelekom» AQ, «KazTransCom» AQ, «GSM-Qazaqstan «Qazaqtelekom» AAQ», «Mobaıl Telekom - Servıs» JShS, «Kar-Tel» JShS jáne taǵy basqa kompanııalar boldy, dep habarlady QR Baılanys jáne aqparat mınıstrliginiń baspasóz qyzmeti.
Kezdesý barysynda baılanys operatorlarynyń qyzmetterine qatysty problemalyq máseleleri jáne «Internet jelisine jappaı, keńjolaqty qoljetimdilikti damytý, sonymen qatar, baılanys operatorlarynyń (tehnıkalyq, zańdy, ekonomıkalyq) problemalyq máselelerin sheshý jónindegi jol kartasyn» ázirleý boıynsha jumys tobyn qurý máseleleri talqylandy.
Qazaqstan Respýblıkasy Baılanys jáne aqparat mınıstri Asqar Jumaǵalıev, 3G standartyndaǵy uıaly baılanystyń Qazaqstanda damýyna erekshe nazar aýdardy. Mınıstrdiń aıtýynsha, bul «azamattardyń jıi júginetin máseleleriniń biri bolǵandyqtan, búgingi tańdaǵy ózekti problemalyq másele, sol sebepti Qazaqstan Respýblıkasy Premer-Mınıstriniń erekshe nazarynda».
«3G standartyn engizý úshin qajetti radıojıilik spektrin qamtý problemalary ótken jyldyń sońynda sheshilgen bolatyn, degenmen, uıaly baılanys operatorlary radıojıilik spektrine ruqsatty rásimdeýden bas tartty. Olardyń aıtýynsha, qoldanystaǵy zańnamada radıojıilik standartyn paıdalaný úshin salymdardyń mólsheri bólek qarastyrylmaǵan, sol sebepti jyldyq tólemaqy mólsheri joǵary.
Eske sala keteıik, QR Premer-Mınıstri K.Másimovtyń tapsyrmasy boıynsha Qazaqstan Respýblıkasy Baılanys jáne aqparat mınıstrligi uıaly baılanys operatorlary úshin salyq mindettemelerin tómendetý maqsatymen 3G standartyndaǵy radıojıilikti paıdalanǵany úshin jyldyq tólemaqyny anyqtaý máselesin talqylaıtyn jumys tobyn qurǵan bolatyn. Atalǵan máseleler jumys tobynda qarastyrylýda.
Májilis aýqymynda uıaly baılanys operatorlarynyń barlyǵy qoǵam aldyndaǵy áleýmettik jaýapkershilikterin túsinetindikterin jáne qyzmetterdiń tarıfterin tómendetý jónindegi sheshimderi týraly habarlady. Sondaı-aq, baılanys kompanııalary óz qyzmetteriniń tarıfterin «Interkonnekt» eseptesý stavkasymen tómendetý jónindegi usynystaryn jaqyn arada berý jóninde ózderine mindettemeler aldy.
Kezdesý sońynda, Qazaqstan Respýblıkasy baılanys jáne aqparat mınıstrliginiń Baılanys jáne aqparat komıtetiniń tóraǵasy R.Nurshabekov QR Salyq kodeksine uıaly operatorlardyń salyq tólemderin tómendetý týraly tolyqtyrýlar jobasyn qarastyrý barysynda, uıaly baılanys operatorlarynyń tarıfterin tómendetýge arnalǵan sharalary eskeriletini týraly aıtyp ótti.
Anyqtama: Qazaqstannyń Baılanys operatorlarynyń keńesi - Qazaqstan Respýblıkasy Baılanys jáne aqparat mınıstrligi janyndaǵy telekommýnıkatsııa salasyndaǵy memlekettik saıasatty jetildirý boıynsha usynymdardy óńdeýdi jáne jumystardy úılestirýdi júzege asyratyn konsýltatsııalyq-keńesshi organ. Oǵan telekommýnıkatsııalyq qyzmetterdi usynatyn barlyq kompanııalardyń basshylary kiredi. Jalpy kezdesý sheńberinde, túrli problemalar kóterilip, olardy sheshý joldary talqylanady. Kezdesý aı saıyn ótkiziledi
