Jaqyn arada munaı baǵasy quldyraı ma

ALMATY. QazAqparat - Aldaǵy ýaqytta munaı baǵasy arzandaýyn jalǵastyrýy múmkin. Bul týraly Fitch Ratings tabıǵı resýrstar jáne shıkizat taýarlary boıynsha saraptamalyq toptyń dırektory Dmıtrıı Marınchenko málimdedi, dep habarlaıdy QazAqparat tilshisi.

Munaı baǵasy sońǵy kezderi úzdiksiz ósip keledi. Brent markaly munaıdyń barreli 75 dollarǵa jetti. Qazir bul kórsetkish 73.45 dollar kóleminde. Jyl basynda mundaı baǵa arman sııaqty bolyp kóringen.

Soǵan qaramastan Dmıtrıı Marınchenko munaı baǵasynyń tómendeý yqtımaldylyǵy, onyń baǵasynyń ósý yqtımaldylyǵynan asyp ketetindigin aıtady.

«Qazirgi jasalyp jatqan saýda kelisimderindegi munaıdyń ortasha baǵasy - 60 dollardyń aınalasynda. Turaqty faktorlarǵa súıensek, negizgi baǵa 55-60 dollar kóleminde. Geosaıası máselelerdiń áserinen baǵa sál kóterilýi múmkin, biraq ol kóp emes»,-deıdi ol.

Baǵa ósimine áser etetin faktorlar týraly aıta kele, sarapshy 2016 jyldyń qazan aıynda munaı óndirýshi elder ózara óndiris deńgeıin tómendetý týraly OPEK+ shartyna qol qoıǵanyn jetkizdi.

«Saýd Arabııasy munaı óndirýdi kelisimde kórsetilgen mejeden de tómendetip tastady. Venesýeladaǵy munaı óndirisi ishki qaqtyǵystar nátıjesinde azaıyp otyr. Qazaqstan kelsimge sáıkes tolyq jumys istep otyr»,-dedi sarapshy.

Baǵanyń qubylýyna áser etetin taǵy bir faktor - geosaıasat.

«Sońǵy jarty jyl geosaıasat turǵysynan alǵanda tartysqa toly bolyp tur. Saýd Arabııasyndaǵy muragerlik, Sırııa aınalasyndaǵy soǵys pen Taıaý Shyǵystaǵy qaqtyǵystar, sonymen qatar AQSh pen Reseı teketiresi jáne sanktsııalar baǵaǵa qatty áser etedi»,-dedi Dmıtrıı Marınchenko.

Fitch Ratings esebine sáıkes munaı baǵasyn tómendetýi múmkin taǵy bir faktor bar, ol AQSh óndiretin taqtatas munaıy.

«Qazir ol óndiris qarqyndy damyp keledi. Atalmysh munaı óndirisiniń kólemi bıyl táýligine 2 mln barrelge jetýi múmkin. Sonyń saldarynan biz defıtsıt jaǵdaıynan profıtsıt jaǵdaıyna ketýimiz múmkin. Bul - munaı baǵasy bıyl tómendeı bastaıdy degen sóz»,-deıdi sarapshy.

AQSh óndirýshiler qandaı baǵaǵa bolsyn tóselýge daıyn. Olar 50-60 dollar tipti odan da tómen baǵa qalyptassa da qınalmaıdy.

«AQSh naryǵynda baǵa rettelmeıdi. Bul básekelester úshin óte paıdaly»,-deıdi ol.

Sarapshylar sonymen qatar munaı baǵasyna áser etetin faktorlardyń budan da kóp bolýy múmkin ekendigin aıtady. Bul jerde tek bolýy múmkin tórt faktordyń ekeýi ǵana aıtylyp otyr.