Jaqyn arada Eýroodaqtyń Qazaqstandaǵy áýe kompanııalaryna qatysty sanktsııalarynyń kúshi joıylmaq
ASTANA. QazAqparat - QR Investıtsııalar jáne damý mınıstrligi Eýropalyq komıssııa tarapy Qazaqstannyń áýe kompanııalaryna qatysty sanktsııalardyń kúshin joıady dep boljap otyr.
Bul týraly búgin QR Parlamenti Májilisiniń ekonomıkalyq reforma komıtetiniń kóshpeli otyrysynda atalǵan vedomstvonyń birinshi vıtse-mınıstri Jeńis Qasymbek málim etti.
«Tórt jyldyq jumystyń qorytyndysy boıynsha IKAO aýdıtiniń qorytyndysyn ótken aptada aldyq. Sol ýaqytta bizdiń avıatsııa EO «qara tizimine» engen bolatyn. Osy rette bizge qatysty eleýli eskertpeleriniń barlyǵy joıyldy. IKAO qaýipsizdigine sáıkestik deńgeıi bizde bıyl 75 paıyzdy qurady, al ortasha eýropalyq kórsetkish 70 paıyz shamasynda. Biz keshe ǵana Eýropalyq odaqqa sanktsııalardy joıý týraly ótinimdi jiberdik. Jaqyn arada barlyq áýe kompanııalaryna qatysty keleńsiz sharalardyń kúshi joıylady dep kútýdemiz»,-dedi J. Qasymbek.
Budan buryn habarlanǵandaı, QR IDM Azamattyq avıatsııa komıteti IKAO-nyń eleýli eskertpeleriniń barlyǵyn joıdy. Qazirgi shaqta qazaqstandyq «Eır Astana» avıakompanııasynan ǵana EO elderine ushýǵa shekteýlerdiń barlyǵy alynyp tastalǵan bolatyn.
