Jaqyn arada AQSh-tyń klassıkalyq radıosynan qazaq ánderi shyrqalady
ASTANA. QazAqparat - 20-27 naýryz aralyǵynda halyqaralyq yntymaqtastyq jáne tájirıbe almasý maqsatynda AQSh-tyń «Classical KUSC» mamandary Almatydaǵy «Classic» radıosynda bolyp, ortaq kelisimge qol qoıdy, dep habarlady «Qazaqstan» RTRK baspasóz qyzmetinen.
Naqtyraq aıtqanda, Los-Andjeles radıostantsııasynyń bas mamandary Brenda Barns (Ońtústik Kalıfornııa Ýnıversıtetiniń radıo jáne «Classical KUSC» prezıdenti) jáne Krıstofer Mendez (zamanaýı tehnologııalar mamany) Almatydaǵy «Classic» radıosynda («Qazaqstan» Respýblıkalyq teleradıokorporatsııasynyń quramyna kiredi) bolyp, radıo qyzmetimen tanysty.
«Bul radıo - men kórgen klassıkalyq mýzykanyń úzdik radıolarynyń biri. Tanysyp, ári uzaq merzimdi áriptestikke qol jetkizgenimizge qýanyshtymyz. Qalanyń ádemiligine, qazaqtardyń qonaqjaılyǵyna jáne kásibıligine tánti boldyq, Qazaqstan memleketiniń tutas tabysyna tań qalmasqa shara joq», - dedi «KUSC» radıosynyń prezıdenti Brenda Barns. «Los-Andjelestik áriptesterimizben kezdesýimiz sátti ótti: biz kóptegen paıdaly aqparatqa qol jetkizdi. Eń bastysy, Los-Andjeles, San-Frantsısko, Santa-Barbara, Santa-Klarıta, Palm-Sprıngsta, Taýzend-Okýstte qazaq mýzykasy, bizdiń kompozıtorlar men oryndaýshylar jaıynda translıatsııalanatyn turaqty baǵdarlama týraly kelisim jasadyq. Bizdiń sazgerlerimizdiń búkil álemge pash etilýi óte mańyzdy», - dedi «Classic» radıosynyń dırektory Raýshan Djýmanııazova. Kezdesýler klassıkalyq mýzyka formatynda habar taratatyn radıonyń ereksheligi týraly máselelerge, mádenıet pen ónerdi damytýǵa, jańa medıaǵa arnaldy. Talqylaýǵa, sondaı-aq «Qazaqstan» RTRK ınternet redaktsııa bóliminiń qyzmetkerleri jáne Qurmanǵazy atyndaǵy Qazaq Ulttyq konservatorııasynyń stýdentteri qatysty. «Classic» radıosy - habar taratýy tolyǵymen túrli janrdaǵy jáne ulttyq mektepterdiń akademııalyq mýzykasyna negizdelgen biregeı radıostantsııa. Bul Qazaqstan Respýblıkasynyń aýmaǵyndaǵy klassıkalyq mýzykanyń tuńǵysh jáne jalǵyz radıostantsııasy. Radıo 2011 jyldyń 6 maýsymynan bastap habar tarata bastady. Qazirgi ýaqytta eki iri qalada: Almaty (102,8 FM) jáne Astana (102,7 FM) qalalarynda habar taratady. «Classic» radıosy álem boıynsha barlyq áriptesterimen birlese qyzmet etedi. Ásirese, Mıýnhenmen («BR-klassik») jáne Máskeýmen («Orfeı») jasalǵan yntymaqtastyq tabysty boldy. Sondaı-aq, «BBC 3» (London) jáne «Radio Classique» (Parıj) radıostantsııalarymen yntymaqtastyq qatynas damyp keledi. «Classical KUSC» radıosy - AQSh-taǵy klassıkalyq mýzykanyń iri qoǵamdyq radıostantsııasy. Radıostantsııanyń 60 jylǵa jýyq tarıhy bar. 1931 jyldan bastap, «Classical KUSC» radıosynan Metropolıten Operadan qoıylymdar beriledi.
