#JaqsylyqJasa: Rýdnyılyq taksı júrgizýshisi turǵyndarǵa ystyq tamaq taratýda
Mundaı qaıyrymdylyq sharany áýeli Rýdnyı qalalyq «Nur» meshitiniń qyzmetkerleri bastap qolǵa aldy. Din qyzmetkerleri aıazdy kúnderi tońǵan turǵyndarǵa, meshitke kelgenderge tegin tamaq berdi. Sondaı-aq, ımamdar meshittiń aqsaqaldaryna dastarhan jaıdy. Meshitke kelgen barsha jamaǵat óz razylyqtaryn bildirdi.
Úskirik aıazǵa qaramaı turǵyndarǵa tegin qyzmet kórsetip júrgenderdiń ishinde rýdnyılyq tájirıbeli taksı júrgizýshi Kákimjan Jamanov ta bar. Ol turǵyndardy qajetti jerine tegin jetkizip salyp, kóshe tazalap júrgenderge, stýdent jastarǵa ystyq tamaq taratyp júr.
«Qalalyq meshittiń bastamasyn qoldaǵymyz keldi. Taǵy birneshe taksı júrgizýshi birigip, aıaz synǵansha halyqqa tegin qyzmet kórsetýdi uıǵardyq. Aýrýhana, ortalyq bazar, halyqqa qyzmet kórsetý ortalyǵy syndy halyq kóp jınalatyn oryndarǵa baryp, turǵyndarǵa qyzmetimizdi usynyp júrmiz. Shynyn aıtsam, jurttar bastapqyda tańǵalady. Qazirgideı sýyqta jol boıynda turǵan adamdardy jarysa alyp ketip jatqan áriptesterimdi kórgende ish jylıdy. Qala halqy batasyn berip, shynaıy alǵystaryn bildirýde», - deıdi Kákimjan Jamanov.
