#JaqsylyqJasa: Pavlodarda ınspektorlar muqtaj jandarǵa kómir áperip jatyr

PAVLODAR. QazAqparat - Pavlodar oblysyndaǵy Aqtoǵaı jáne Sharbaqty aýdandarynda qylmystyq-atqarý júıesiniń ınspektorlary aýyl turǵyndarynyń úılerin jylytýǵa kómektesip jatyr, dep habarlaıdy QazAqparat tilshisi.

«Tórt bala tárbıelep otyrǵan Aqtoǵaı turǵynyna eki aıǵa jetetin otyn ákeldi. Budan buryn «Qamqorlyq» aktsııasyn ótkizý barysynda jalǵyzbasty anaǵa ınspektorlarmen birge aýdandyq jumyspen qamtý jáne áleýmettik baǵdarlamalar bóliminiń mamandary da qol ushyn bergen edi. Ol kezde kópbalaly anaǵa bir aılyq azyq-túlikter ákelgen bolatyn», - dep habarlady Pavlodar oblystyq qylmystyq-atqarý júıesi departamentinen.

Óńirlik QAJ departamentiniń deregi boıynsha, probatsııa qyzmetkerleriniń basty mindeti - qylmystardyń qaıtalanbaýyn qadaǵalap, isti bolǵandarǵa kómektesý. Inspektorlar olardyń úılerin aralap, áńgimelesip shyǵady.

«Aqtoǵaı aýdany probatsııalyq qyzmetinde esepte turǵan barlyq tulǵalardyń materıaldyq-turmystyq jaǵdaıy baqylaýǵa alynǵan. Olardyń barlyǵy mekenjaılary boıynsha tekserilip turady. Sondaı-aq, esepte turǵyn sottalýshylardyń jumyspen qamtamasyz etilýine erekshe kóńil bólinedi. Biz aýdandyq jumyspen qamtý bólimimen tyǵyz jumys istep, olarǵa kómektesip jatyrmyz», - dedi Aqtoǵaı aýdany probatsııalyq qyzmetiniń aǵa ınspektory Rızabek Alın.

Al, urlyq jasaǵany úshin bir jyl alty aıǵa bas bostandyǵy shektelgen Sharbaqty turǵynyna kómir ákelgen.

«Sharbaqty aýdandyq probatsııa qyzmetine er adam kelip, pesh jaǵatyn kómiri taýsylǵanyn aıtty», - dedi óńirlik QAJD-dan. Sharbaqty aýdandyq probatsııa qyzmetiniń qyzmetkerleri oǵan kómektesý úshin jumyspen qamtý jáne áleýmettik baǵdarlamalar bólimine júgingen. Bólim qatty otyn satyp alýǵa bıýdjetten aqsha bólse, probatsııa qyzmeti ony jetkizý úshin kólikpen kómektesken.

«Memleket tarapynan osyndaı kómek kórsetý sottalýshylardyń qylmysty qaıtalamaýyna sep bolady», - dep esepteıdi Pavlodar oblystyq QAJD Probatsııa qyzmetiniń basashylyǵy.

Avtor: Anton Gagarın