#JaqsylyqJasa: Óskemen meshiti aıazdy kúni tegin avtobýs shyǵardy

ÓSKEMEN. QazAqparat - Óskemende jolaýshylardy qala ishine tegin tasymaldaıtyn avtobýs jolǵa shyqty, dep habarlaıdy QazAqparat tilshisi.

Búgin Óskemende aýa temperatýrasy mınýs 37 gradýsty kórsetip tur. Osyǵan baılanysty Qazaqstan Musylmandar dinı basqarmasynyń Óskemen aımaqtyq ókildigi jolaýshylardy tegin tasymaldaıtyn avtobýs shyǵardy.

«Búgin kún juma. Al kún bolsa sýyq. Osyǵan oraı qalanyń bir shetinen ekinshi basyna deıin qatynaıtyn №46 baǵdarlyq bir avtobýsy tańǵy saǵat 6.00-den 15.00-ge deıin tegin qyzmet kórsetedi. Aıaz saqtalsa, kelesi jumada da bul aktsııa jalǵasýy múmkin», - deıdi «Zeket» qorynyń ókili.

Turǵyndar aktsııanyń aıazdy kúni qolǵa alynǵanyna rıza.

«Men issaparǵa barý úshin aıaldamaǵa erte shyqqanmyn. Tegin avtobýspen jetip rıza boldym. Meshit ókilderi bul aktsııany der kezinde qolǵa alyp otyr», - deıdi qala turǵyny Aıgúl Bazarova.