#Jaqsylyqjasa: Mańǵystaýlyqtar kópbalaly anaǵa úı alyp berdi
AQTAÝ. QazAqparat - Mańǵystaý oblysy Munaıly aýdanynyń turǵyny, kópbalaly ana Lıýdmıla Smaǵulovaǵa qaıyrymdy jandar úı alyp berdi, dep habarlaıdy QazAqparat tilshisi.
Lıýdmıla Smaǵulova 7 balany bir ózi tárbıelep otyr. 10 jyldan astam ýaqyt árkimniń bosaǵasyn panalap júrgen. Kópten ańsaǵan baspanaǵa qaıyrymdy jandardyń kómegimen qol jetkizdi.
Turǵyn úıdi satyp alýǵa «Biz adambyz - biz birgemiz» qaıyrymdylyq qory kómektesken. Qor músheleri ananyń jaǵdaıyn kópshilikke jarııalap, halyqtan kómek suraǵan. 
Batyr ana muń-muqtajyn elegen azamattarǵa alǵysyn aıtty.
«Barlyǵyna raqmet aıtqym keledi. Kóp adamdar kómektesti. Qanshama halyq estip, tamaqty da, kıimdi de ákelip jatty», - deıdi Lıýdmıla Smaǵulova.
Qazir úıge jylý júıeleri tartylýda. Kerek-jaraqpen qamtylǵan soń, otbasy tolyq qonystanbaq.
«Qazirgi kezde kópbalaly, jalǵyz basty analarǵa kómektesemiz. Qordyń jumys jasap jatqanyna 10 jyldan asty. Qazir bizde qıyn jaǵdaıda ómir súrip jatyrǵan 30 otbasy bar. Solarǵa tamaqpen, kıimmen járdesýdemiz»,-deıdi qor dırektory Imanǵazy Dosmuhambetov.
