#JaqsylyqJasa: Qostanaıda HQKO qyzmetkerleri kelýshilerdi úılerine tegin jetkizip tastaıdy
QOSTANAI. QazAqparat - «Jaqsylyq jasa» aktsııasyna elimizdiń túkpir-túkpirindegi azamattar atsalysyp jatyr. Qostanaılyq Halqqa qyzmet kórsetý ortalyǵy da bul sharaǵa belsendi úles qospaq, dep habarlaıdy QazAqparat.
«Azamattarǵa arnalǵan úkimet» memlekettik korporatsııasynyń oblystyq fılıaly dırektorynyń orynbasary Azamat Imambekov aıtqandaı, óńirde aıazdyń beti qaıtqansha turǵyndar úılerine ortalyqtyń kólikterimen tegin jete alady.
«Biz kelýshilerimizge qurmetpen qaraımyz. Olardyń densaýlyqtary biz úshin mańyzdy. Ózderińiz bilesizder, osy aptanyń aıaǵyna deıin Qostanaıda úskirik aıaz synbaıdy. Sondyqtan arnaıy kezekshilik bekitip, azamattardy úılerine tegin jetkizýdi qarastyryp otyrmyz. Qazirgi ýaqytta turǵyndar qaladaǵy №1 HQKO-na kóbirek kelýde. Olardyń ishinde múmkindigi shekteýli jandar men qart kisiler kóp. Al mynadaı qubylmaly aýa raıy kezinde olardyń jaǵdaılaryna beı-jaı qaraı almaımyz»,- deıdi Azamat Imambekov.
Qazir HQKO adamdardy úılerine deıin jetkizý úshin 4 avtokólikti kezekke qoıǵan. Turǵyndar 7-9 aqpan aralyǵynda saǵat 09:00-20:00 aralyǵynda atalǵan kómekti paıdalana alady.
Aıta keteıik, «Jaqsylyq jasa» aktsııasy aıasynda rýdnyılyq taksı júrgizýshileri aıazdy kúnderi turǵyndarǵa tegin qyzmet kórsetip jatyr.
