Jaqsylyqqa úles qosqanym úshin qýanamyn - 30 adamdy qutqarǵan órt sóndirýshi
KÓKShETAÝ. QazAqparat – Otandy qorǵaý qaı zamanda da bizdiń elimizdiń azamattarynyń qasıetti boryshy bolyp keldi. Árqashanda Otan qorǵashylarmen birge órt sóndirýshilerde qatar turady. Sondaı batyrlarymyzdyń biri – Kókshetaý qalalyq № 10 órt sóndirý bóliminiń qaraýyl bastyǵy Qaınar Turarov, dep habarlaıly QazAqparat tilshisi.
Búgingi beıbit kúnniń batyry Qaınar Turarov aǵymdaǵy jyldyń aqpan aıynda erligimen kózge tústi. Sol kezde oblys ortalyǵyndaǵy kóppáterli turǵyn úı órtke oranyp, 100-de astam adam tilsiz jaýdyń qursaýynda qaldy. Tájirıbeli órt sóndirýshi tótenshe jaǵdaıdy joıý sharasyna basshylyq etti. Onyń basshylyǵymen 120 turǵyn órt oshaǵynan evakýatsııalanyp, 30 adam qutqaryldy.
Órt, sý sekildi tilsiz jaýmen kúresip, adamdarǵa kómek berýge asyǵatyn mamandyqty tańdaý úlken jaýapkershilikti talap etedi. Osy salada tapjylmastan eńbek etip kele jatqan Qaınar Turarovtyń órt sóndirý qyzmetindegi jumys ótili 20 jyldan asty. Ol ár túrli kúrdeli órtti sóndirýde jetekshilik etip, tabandylyq pen erlik tanytty. Tótenshe jaǵdaı qyzmetindegi uzaq jylǵy eńbegi men qyzmetine adaldyǵy úshin ol ár túrli deńgeıdegi birneshe medal jáne grammotalarmen marapattalǵan.
Ol osy jaýapkershiligi joǵary órt sóndirýshi mamandyǵyn tańdaǵanyna esh ókinbeıdi, kerisinshe adam ómirine arasha túsetin qyzmet dep maqtan tutady.
«Men úshin órt sóndirýshiden asqan mamandyq joq. Bizderge azamattarymyzdyń ómiri men tynyshtyǵy senip tapsyrylǵan. Sondyqtan, ár qashan jumystan úıge oralarda, bir adamnyń bolsa da, ómiri men densaýlyǵyn saqtaýǵa kómekteskenim úshin qýanamyn. Bul meniń el azamattarynyń aldyndaǵy basty mindetim», - deıdi órt sóndirýshi Qaınar Turarov.
Búginde tájirıbeli órt sóndirýshi Qaınar Turarov ózinen keıingi jastarǵa mamandyqtyń ereksheligi men qyr-syryn úıretip, tálimger bolyp júr.
