#Jaqsylyq jasa: Túrkistandaǵy kópbalaly medıtsına qyzmetkerlerine kómek kórsetildi
Qaıyrymdy jandar jumyskerleriniń jergilikti kásipodaǵy músheleri alty aýdandaǵy aýrýhanalarǵa baryp, turmysy tómen qyzmetkerlerge eń qajetti degen azyq-túlikterdi taratty.
Sharany oblystyq densaýlyq saqtaý basqarmasy «Densaulyq» jumyskerdiń jergilikti kásipodaǵymen birlesip uıymdastyrdy.
Qaıyrymdylyq shara aldynda medıtsınalyq mekemelerde jumys isteıtin kópbalaly analar men muqtaj otbasylardyń tizimi jasalǵan.
Saryaǵash, Keles, Maqtaaral, Jetisaı, Qazyǵurt jáne Shardara aýdandarynda uıymdastyrylǵan qaıyrymdylyq sharasy aıasynda turmys jaǵdaıy tómen analarǵa kómek kórsetildi.
Sondaı-aq, kásipodaq qyzmetkerleri bul kúni Jetisaı aýdanyna qarasty Útirtóbe aýylynda turatyn meıirbıke Gúlaıym Nurjanovanyń da úıine arnaıy bardy. Zeınet jasyna jaqyndaǵan medıtsına qyzmetkeriniń eki aı buryn júkti kelini qaıtys bolyp, 4 nemeresin qaramaǵyna alǵan. Meıirbıkeniń turmys jaǵdaıynyń qıyndyǵyn túsingen kásipodaq músheleri januıaǵa qoldan kelgenshe azyq-túlik ákelip berdi.
Al, Datqa aýylynyń turǵyny Jadyra Qoshqarovanyń úıi aǵymdaǵy jyldyń 11-shi naýryzda órtenip ketken bolatyn. Bul otbasynyń jaǵdaıyna beı-jaı qaramaǵan kásipodaq basshylyǵy qoldan kelgenshe kómek kórsetti. Sol sııaqty Keles aýdanynda turatyn Tolǵanaı Ábilqasymova da qaıyrymdylyq sharasynan shet qalmady. Kúmis alqa ıesi tórt aı buryn ınsýlt alyp, densaýlyǵy syr bergen. Onyń ústine alty balasy bar bolsa, onyń tórteýi kámelet jasyna tolmaǵan. Osyny eskergen kásipodaq músheleri kúmis alqa alǵan anaǵa 20 myń teńgeniń azyq-túligin jetkizip berdi.
«Mundaı qaıyrymdylyq sharasyn endi biz oblystyń ógze de aýdan-qalalarynda ótkizýdi josparlap otyrmyz. Densaýlyq saqtaý uıymdary jumyskerleriniń jergilikti kásipodaǵy tarapynan óńirdegi medıtsına qyzmetkerlerine azyq-túlik taratyp, materıaldyq turǵydan da kómek kórsetetin bolamyz. Aldaǵy ýaqytta medıtsınalyq uıymdarda eńbek etetin kópbalaly analardyń tizimin jasaqtap, olarǵa jan-jaqty qoldaý jasalady»,- deıdi Túrkistan oblystyq «Densaulyq» jumyskerdiń jergilikti kásipodaǵynyń tóraǵasy Ashat Aqylbekov.
