#Jaqsylyq jasa: Mektep túlekteri muqtaj otbasylarǵa kómek kórsetti
Syrym aýdandyq «Syrym eli» gazetiniń bas redaktory Baýyrjan Shırmedınulynyń málim etkenindeı, Qadyr Myrzalıev atyndaǵy 11-synyp oqýshylary aýdan ortalyǵy Jympıty aýylynda turatyn áleýmettik jaǵdaıy tómen úsh otbasyna bir aılyq azyq-túlik alyp berdi.
Olar osylaısha mektep bitirý keshine josparlanǵan qarjynyń edáýir bóligin qaıyrymdylyq maqsatyna jumsady.
Sonymen qatar, oqýshylar kómekke muqtaj qarııalardyń qonysyna baryp, olardyń úıleri men aýlalaryn tazalaýǵa da ýaqyt tapty.
Atalmysh mektep dırektorynyń tárbıe isi jónindegi orynbasary Erbol Daýylovtyń aıtýynsha, qaıyrymdylyq bastamasyn túlekterdiń ózderi kótergen. Olar qasıetti Ramazan aıynda toıdyń mázirindeı asta-tók dastarhan jaıyp, ysyrap jasaǵysy kelmedi.
«Túlekterdiń usynysyn mektep ákimshiligi, ata-analar komıteti qoldady. Synyp jetekshileri Jansaıa Esenǵalıeva, Gúldana Nuǵmanovanyń qoldaýymen «Qaıyrymdylyq kerýeni» sharasy aıasynda jaldamaly páterde turatyn, mektep jasyndaǵy balalary bar otbasylar qamtyldy. Túlekter keshi mektepte qarapaıym túrde atalyp ótiletin bolady», - dedi E.Daýylov.
