#Jaqsylyq jasa: Qyzylordada bilim bólimi turmysy tómen otbasyna baspana salyp berdi
Mundaı qamqorlyq Qyzylorda qalasyndaǵy «Araı» móltek aýdanynda turatyn eki balanyń anasy Gúlsara Qýanyshbaevaǵa jasaldy. Bul otbasy on jyldan beri qabyrǵasy ajyrap turǵan turǵyn úıde ómir súrip kelgen edi. Olardyń turmystyq jaǵdaıy qıyn bolatyn. Otaǵasy Tursynbaı Taıyrov aıyqpas dertke shaldyqqan. Sonyń saldarynan jumys isteı alǵan joq. Byltyr ómirden ozdy. Eki qyzymen qalǵan Gúlsara Qýanyshbaeva «Qyzylorda tazalyǵy» mekemesinde eńbek etedi. Degenmen densaýlyq jaǵdaıyna baılanysty keıde jumysqa shyǵa almaı qalady.
Bul otbasynyń eki qyzy Qyzylorda qalasyndaǵy №278 mektepte bilim alady. Qalalyq bilim bóliminiń basshylary sol eki qyz arqyly atalmysh otbasynyń turmystyq jaǵdaıymen tanysty. Osylaısha qalalyq bilim bólimi men oǵan qarasty mektep dırektorlary turmysy tómen otbasyna jańa baspana salyp berýge sheshim qabyldady. Nátıjesinde jaqynda Gúlsara Qýanyshbaeva men eki qyzy jańa baspanaly boldy.
«Bul is qalalyq bilim bóliminiń bastamasymen qolǵa alyndy. Ramazan aıynda bir otbasyna qýanysh syılap otyrmyz. Atalmysh isti byltyrdan bastap qolǵa alǵan bolatynbyz», - dedi qalalyq bilim bólimi basshysynyń orynbasary Janat Kamıtova.
Aıta keterligi, turǵyn úıdiń barlyq qujattary tolyqtaı rásimdeldi. Sondaı-aq, gaz, sý jáne jaryq júıelerimen tolyqtaı qamtamasyz etildi.
