#Jaqsylyq jasa: HQKO qyzmetkerleri naýqastar úshin qan tapsyrdy
ALMATY. QazAqparat - Almatyda «Azamattarǵa arnalǵan úkimet» memlekettik korporatsııasy fılıalynyń 200-ge jýyq qyzmetkeriniń onkonaýqastardy qoldaý maqsatynda «Qan tapsyryp, úmit syıla» qaıyrymdylyq aktsııasyna qatysty, dep habarlaıdy QazAqparat tilshisi.
«Árbir adam donor bolýǵa jáne bireýlerge ómir syılaýǵa qabiletti. Osy kúnge deıin qan quıý - adam ómirin alyp qalýdaǵy múmkindiktiń biri ekeni belgili. Ózgelerdiń ómirin qutqarý úshin qanyn aqysyz tapsyrǵan adamnyń isi quptarlyq áreket. Sondyqtan barlyq áriptesterime aktsııaǵa qoldaý kórsetkeni jáne atsalysqany úshin alǵys aıtamyn. Aktsııa barysynda jınalǵan barlyq qan qala aýrýhanalaryndaǵy aýyr naýqastardy, onyń ishinde onkologııalyq aýrýlardy emdeýge baǵyttalatyn bolady», - deıdi memlekettik korporatsııanyń Almaty qalasy boıynsha fılıalynyń PR-menedjeri Jańyl Ápetova.
Aýrý aıtyp kelmeıtini belgili. Adam densaýlyǵy nasharlaǵanda onyń tez saýyǵyp ketýi quıylatyn qan sapasyna, onyń komponentterine jáne qan toby saı keletin donordyń dereý tabylýyna baılanysty.
«Búginde Almatynyń qan ortalyǵy 20-dan astam medıtsınalyq uıymǵa qyzmet kórsetedi. Jylyna 6-7 myń naýqasqa, onyń ishinde 1000-nan astam balaǵa bizdiń ortalyqtan qan komponentteri beriledi. Sondyqtan Almaty qalasy boıynsha «Azamattarǵa arnalǵan úkimet» memlekettik korporatsııasy fılıalynyń bastamasyn biz úlken qýanyshpen qarsy aldyq. Ártúrli patologııasy bar patsıentterdi emdeý úshin aýrýhanalardyń qan preparattaryna qajettiligi árdaıym týyndap otyrady. Ókinishke qaraı, onkologııalyq naýqas balalar kún saıyn qanǵa muqtaj. Sondyqtan birinshi kezekte jınalǵan qan №2 qalalyq klınıkalyq balalar aýrýhanasynyń kishkentaı patsıentterine jiberiledi. Sondaı-aq №7 qalalyq klınıkalyq aýrýhananyń onkogematologııalyq naýqastaryn emdeýge beriledi»,-dedi Almaty qalasy qan ortalyǵynyń dırektory Jandos Nádirov.
Aıta ketý kerek, memlekettik korporatsııanyń qyzmetkerleri jyl saıyn qan ótkizip turady. Qyzmetkerler arasynda qurmetti donorlar da bar.
«Azamattarǵa arnalǵan úkimet» memlekettik korporatsııasynyń Almaly front-keńsesiniń qyzmetkeri Dınara Turǵalıeva sońǵy on jylda 57 ret qan tapsyrdy, bul - 25 lıtr qan. Qan ortalyǵy ony «Senimdi donor» nomınatsııasymen marapattaǵan.
«Denimniń saýlyǵy maǵan ózge jandarǵa kómek kórsetýge múmkindik beredi. Donorlyqtyń materıaldyq tusy meni múlde qyzyqtyrmaıdy. Qanym adamnyń ómirin aman alyp qalýǵa kómekteskeni týraly alǵys jazylǵan habarlamalar kelgende qýanyshqa bólenemin»,- deıdi Dınara.
