#Jaqsylyq jasa: Aqtóbelik kásipker bes otbasyǵa páter syılady
Búgin Aqtóbedegi Jubanovtar álemi ortalyǵyn salǵan Máıtekovter otbasy kópbalaly analarǵa qýanysh syılady. Barlyǵy bes otbasy 1 jáne 2 bólmeli páterge ıe boldy. Olardyń arasynda kópbalaly, múgedek bala baǵyp otyrǵandar men jalǵyzbasty ana bar. Sonymen qatar shilde aıynan bastalatyn «Baqytty otbasy» jobasynyń alǵashqy qatysýshy 20 otbasyǵa 500 myń teńgeniń sertıfıkatyn syılady. Bul otbasylar alǵan qarajatyn páterdiń alǵashqy jarnasyna jumsaıtyn bolady.
Sharaǵa oblys ákimi Ońdasyn Orazalın qatysyp, baspanaly bolǵan azamattardy quttyqtady. Qaıyrymdylyq jasaǵan kásipker azamatqa alǵysyn bildirdi.
«Oblys boıynsha 30 myń adam baspana kezeginde tursa, olardyń ishinde 23 500-i Aqtóbe qalasynda. Bul másele birden sheshilmeıdi, biraq tıisti jumystar júrgizilip jatyr. Biz eń aldymen asa muqtaj jandardy baspanamen qamtamasyz etý úshin barlyq múmkindikti jasaımyz. Osy jyldyń ózinde oblysta 1 mln sharshy metrden asa turǵyn úı salynady, bul degenińiz 8 myńnan asa páter. Olardyń jartysy memlekettiń qoldaýynyń arqasynda az qamtylǵan otbasylarǵa tıimdi sharttarmen beriletin bolady. Demeýshilerdiń bergen qarjysyna 2-3 azamatqa páter alýǵa da bolady. Alaıda, sol qarjyny 20-30 adamǵa alǵashqy jarna retinde bergen tıimdi bolyp otyr. Óıtkeni, olar jaldamaly páterge tóleıtin qarajatty endi óz menshiginde qalatyn baspanasy úshin tóleıdi. Ótkir másele osylaı júıeli túrde sheshilip keledi», - dedi oblys basshysy.
Qaıyrymdylyq shara Halyq ártisi, QR Eńbek sińirgen qaıratkeri ánshi Nurlan Abdýllınniń kontsertimen jalǵasty. Kontsert bıletinen túsken qarjy túgeldeı túrli áleýmettik toptaǵy azamattarǵa beriledi.
