Jaqsylyq jasa: Aqtóbelik qaraýsyz qalǵan 80 jastaǵy qarııany óz qamqorlyǵyna aldy

AQTÓBE. QazAqparat – Aqtóbede ýchaskelik polıtsııa ınspektory Dastan Sultanǵalıev úı-kúısiz qalǵan Lıýdmıla Shevchenkony qamqorlyǵyna aldy, dep habarlaıdy QazAqparat tilshisi.

Lıýdmıla Shevchenko uzaq jyldar boıy densaýlyq salasynda eńbek etken. Keıin zeınetke shyǵyp, jıenderimen bir shańyraqta turdy. Jıeni «bıznes bastaımyn, alǵyshqy jarna qajet» degen soń páterin syıǵa berdi. Іs alǵa baspaı, bári páter jaldady. Kıkiljiń osy jerde bastalǵan.

«Biz baspanamyz qaldyq dep aıtsam bolady. Páter bolmaǵan soń olar da meni kerek etpedi. Shynymdy aıtsam, dalada qaldym. Qaıda bararymdy bilmedim. Kóshede kele jatqan kezde patrýldik polıtsııa kóligi toqtap, meni bólimshege jetkizdi. Sol kezde Dastan Sultanǵalıevti kezdestirdim. «Áje, mundaı halge qalaı tústiń» dep aıtty. Olar maǵan ystyq tamaq berdi, jylytty. Bári jaqsy bolady dep aıtty. Meniń densaýlyǵym syr berdi. Jedel járdem shaqyryp, aýrýhanaǵa tústim. Shyqqan soń Dastannyń úıine keldim. Balalar meni áje deıdi. Áıeli de quraq ushyp júr. Qarttar úıine barǵym kelmeıdi. Zeınetaqym bar, páter jaldap tura alamyn», - dedi Lıýdmıla Shevchenko.

Dastan Sultanǵalıev maqtan etý, kópshilikke jarııalaý úshin emes, óz mindetin oryndaý úshin osy sheshimdi qabyldady.

«Ákimshilik aýmaqqa 2 ret qońyraý tústi. Ýchaskelik ınspektorlar qarııany izdep taýyp, úıine jetkizdi. Kelini, nemeresimen sóılesip, oqıǵanyń mán-jaıy zerdelendi. Kóp uzamaı taǵy da qońyraý tústi. Oqıǵa qaıtalana bergen soń ashyq áńgimege tartyp, sebebi naqtylandy. Ol kelini jáne nemerelerimen bir shańyraqta tura almaıtynyn aıtty. Únemi janjal bolǵan. Denesinde eshqandaı jaraqat belgisi joq. Tek qarııamen emes, kelini jáne nemeresimen de habarlasyp, sóılestik. Sóz arasynda qarııadan bas tartyp, qarttar úıine ótkizýdi surady», - dedi Dastan Sultanǵalıev. Onyń aıtýynsha, qarııa da úıine barýdan bas tartqan.

«Qolynda taıaǵy bar, áreń qozǵalǵan qarııaǵa janym ashyp, áıelime habar berdim. Sol kezde kelinshegim esh qarsylaspaı, úıge ákelýdi surady. Ótken jyldyń qarasha aıynan beri bizdiń janymyzda. Otbasymyzǵa úırendi, jumystan kelgenimde kútip alady. Jylaıdy, eshqaıda jibermeýdi ótinedi. Bul erlik emes. Meniń mindetim - halyqpen tyǵyz qarym-qatynas ornatý, kómek berý. Eger men alyp ketpesem, dalada qalatyn edi», - dedi ol.

Qarııanyń basynan túsken is týraly Aqtóbe qalalyq jumyspen qamtý jáne áleýmettik baǵdarlamalar bólimi biledi.

«Kezinde úıi bolǵan. Jıeni satyp, bızneske salǵan. Bıznes alǵa baspaǵan soń páterdi turǵan. Ájeniń aıtýynsha, nemeresi ózge oblysqa jumysqa ketken.

Ájemen sóılestik, qarttar úıine barýdan bas tartyp otyr. Zeınetaqy jetkilikti, páter jaldaýǵa múmkindigi bar eken. Eger nemeresi zańdy túrde bas tartsa, áleýmettik qyzmetker taǵaıyndaı alamyz. Shyndyǵynda zańsyz turyp jatyr. Qazaqtyń qanyna sińgen asyl qasıet bar. Sol jolmen Dastan Sultanǵalıev kómektesip jatyr», - dedi qalalyq jumyspen qamtý jáne áleýmettik baǵdarlamalar bóliminiń basshysy Maqpal Turmaǵambetova.