Jaqsylyq Úshkempirovtiń ómir joly týraly kitap jaryq kórdi
TALDYQORǴAN. QazAqparat - Grek-rım kúresinen tuńǵysh Olımpıada chempıony, Qazaqstannyń Eńbek Eri Jaqsylyq Úshkempirovtiń ómir joly týraly jazylǵan «Birtýar-Ýnıkalnyı» kitaby oqyrmanǵa jol tartty, dep habarlaıdy QazAqparat tilshisi.
Kitap avtory jazýshy, Qazaqstannyń eńbek sińirgen qaıratkeri, «Alash» ədebı syılyǵynyń ıegeri Səýle Dosjanova. Ol bul romanda Jaqsylyq Úshkempirovtiń balalyq shaǵynan aty ańyzǵa aınalǵan dańqty kezeńine deıingi ǵıbratty ǵumyryn arqaý etken. Kitap Almaty oblysy ákimdiginiń qoldaýymen jaryq kórdi.
Taldyqorǵandaǵy Saltanat saraıynda ótken kitaptyń tusaýkeserine oblys əkimi Amandyq Batalov, qoǵam jáne memleket qaıratkeri, general-polkovnık Sət Toqpaqbaev, kitap avtory, jazýshy Səýle Dosjanova, Qazaqstan Jazýshylar odaǵy basqarma tóraǵasynyń orynbasary Baýyrjan Jaqyp, Jaqsylyq Úshkempirovtiń jary Kúlpan Muqashqyzy men uldary Eldos pen Jeńis, birqatar tanymal jattyqtyrýshylar men belgili sportshylar jəne óńirdegi zııaly qaýym ókilderi qatysty.
«Jaqsylyq Úshkempirov barsha qazaqtyń Jaqsylyǵy edi, bolmysy taza, bilekti de, júrekti, baýyrmashyl, qarapaıym jan edi. Jaqsylyq aǵamyzben men kóp jyl jaqyn aralasyp, dos boldym. Olımpıadadaǵy jeńisti joly, Elbasynyń qolynan Qazaqstannyń Eńbek Eri ataǵyn alýy, aýyl sharýashylyǵynda jemisti jumys istep, óńir halqyna meıirim-shapaǵatyn tıgizgeni – osynyń bárin biz jastarǵa úlgi etýimiz kerek. Jazýshy Sáýle Dosjannyń Jaqsylyq aǵamyz týraly jazǵan kitabyna qoldaý jasap, búgin tusaýkeserin ótkizip otyrmyz. Jaqsylyq Úshkempirovtiń sporttaǵy jolyn jalǵaıtyn órenderdi tárbıeleýge de bar jaǵdaı jasap kelemiz. Elbasynyń tapsyrmasymen oblysta 16 sport keshenin saldyq», - dep atap ótti A. Batalov.
Sol sııaqty oblys ákimi tanymal sportshynyń esimin oblystyq balalar men jasóspirimder mektep-ınternat kolledjine berý jumysy júrgizilip jatqanyn atap ótti.
