Jaqsylyq Úshkempirovtiń qurmetine arnalǵan týrnır: Qazaqstandyqtar 6 «altyn» aldy
ASTANA. QazAqparat – Búgin elorda dańqty balýan Jaqsylyq Úshkempirovti eske alýǵa arnalǵan grek-rım kúresinen 20 jasqa deıingi balýandar arasyndaǵy halyqaralyq týrnır aıaqtaldy, dep habarlaıdy QazAqparat tilshisi.
Sportty damytý dırektsııasynan málim etkendeı, atalǵan saıysta elimizdiń túpkir-túpkirinen kelgen boz kilem sheberlerimen qatar Qyrǵyzstan, Ózbekstan, Tájikstan, Ázerbaıjan men Izraıldiń úzdik 164 sportshysy 3 kún boıy ózara synǵa tústi.
«Bul jarystyń biz úshin orny erekshe. Onyń aýqymy jyldan-jylǵa keńeıip kele jatqany qýantady. Kelesi jyly budan da kóp el qatysýy úshin onyń merzimin jyldyń basyna aýystyrý kerek bolady. Ony Halyqaralyq kúres federatsııasynyń kúntizbesin eskere otyryp, bekitýimiz qajet. Mysaly, osy jarysqa Ózbekstan quramasy biraz myqty balýandaryn jibere almady. Sebebi, onda qazir el chempıonaty ótip jatyr. Al Ázerbaıjan men Qyrǵyzstan quramasy negizgi qurammen keldi», - dedi Qazaqstan grek-rım, erkin jáne áıelder kúresi federatsııasynyń prezıdenti Dáýlet Turlyhanov.
Bul týrnırde qazaq balýandary arasynan Aıbek Aıtbekov (55 kg), Oljas Erǵalı (77 kg), Islam Evloev (82 kg), Nurasyl Amanaly (87 kg), Nurtas Qydyrbaev (97 kg) jáne Johar Ýzarov (130 kg) óz salmaǵynda chempıon atandy. Qazaqstandyq sportshylar jarysty 6 altyn, 5 kúmis, 14 qola medalmen aıaqtady.
«Jazda Azııa chempıonatyna baratyn ulttyq qurama balýandary óz deńgeıin taǵy bir márte kórsetti. Elimizdiń óńirlerinen Aqtóbe oblysy jaqsy nátıje kórsetti. Aldaǵy 2 aıda biz úshin jaýapty jarystar bar. Aldaǵy kúnderi Ázerbaıjan quramasymen birlesip, daıyndyqtyń birinshi kezeńine kiresemiz. Olardyń kózdegeni – Eýropa chempıonaty», - dep málim etti Qazaqstan jastar quramasynyń aǵa bapkeri Qonysbek Túkenov.
Olımpıada chempıony Jaqsylyq Úshkempirovti eske alýǵa arnalǵan báseke osymen úshinshi ret uıymdastyrylyp otyr. Dańqty balýan qaıtys bolǵanǵa deıin boz kilem sheberleriniń týrnıri Jaqsylyq Úshkempirovtiń júldesi úshin ótip kelgen edi.
Osy saıystan keıin elordada Qazaqstan men Ázerbaıjan quramalary birlesken oqý-jattyǵý jıynyn ótkizip, qurlyq chempıonatyna daıyndyqqa kirisedi.
Aıta keteıik, qazaqstandyq balýandar 12-20 shilde aralyǵynda Iordanııa astanasy Ammanda ótetin sary qurlyq básekesinde (U-15 pen 20) baq synasady. Al Ázerbaıjan sportshylary Eýropa chempıonatynyń júldesine talasady. Osy jas sanatyndaǵy álem chempıonaty 14-20 tamyz aralyǵynda Polsha astanasy Varshavada ótpek.
