Jaqsylyq Úshkempirov: Jańa álipbı aǵa býynnan buryn jas urpaqqa kerek

ASTANA. QazAqparat - Qazaq KSR eńbek sińirgen sport sheberi, Olımpıada chempıony Jaqsylyq Úshkempirov bekitilgen latyn grafıkasyndaǵy qazaq álipbıine qatysty pikirin bildirdi, dep habarlaıdy «QazAqparat» HAA tilshisi.

Jaqsylyq Úshkempirov latyn álipbıine kóshý dál ýaqytynda jasalǵan durys qadam dep baǵa berdi.

«Óskeleń urpaqtyń álemde oryn alyp jatqan jańalyqtardan habardar bolýy úshin, tegimiz bir túrki tildes halyqqa búgingiden de jaqyndap, qazaq sportynyń deńgeıin álemdik arenalarda búgingiden de bıiktetý úshin, latyn qarpindegi qazaq álipbıine kóshýimiz qajet. Bul búgingi zamannyń talaby. Jańa álipbıdi meńgerý jastarmen birge aǵa býynǵa da qıyndyq týǵyzbaıdy degen oıdamyn. Sportshylar jańa álipbımen jazýǵa daıyn», - deıdi Jaqsylyq Úshkempirov.

Onyń aıtýynsha, latyn álipbıine kóshý týraly halqymyzdyń arman-tilegi egemendik alǵan jyldary týǵan.

«Latyn grafıkasyndaǵy qazaq álipbıine kóshý - egemendik alǵanymyzdyń jarqyn belgisi. Bul babalardyń muraty edi. Sondyqtan, jeke memleket ekenimizdi bildiretin elimizdiń bul qadamyna qýanyshtymyn. Bizdiń qazirgi urpaqtyń bastamany biraýyzdan qoldap ketkeni qýantady. Aǵa býyn bolyp biz de atsalysýymyz kerek», - deıdi dańqty chempıon.

Jaqsylyq Úshkempirov sonymen birge, aǵa býynǵa jańa álipbıdi meńgerip, zamanmen birge alǵa jyljý esh qıyndyq týǵyzbaıtynyn aıtady.

«Tórt-bes áripke qınalamyz ba? Búkil dúnıe júzi latyn álipbıine kóship ketken. Jas kezimde álemniń 30-40 eline baryp kúrestim. Sol kezde ol eldiń basym bóligi bir-birine uqsas áriptermen jazatynyna mán beretinmin. Demek, Qazaqstan da álem elderiniń kóshinen qalmaýy kerek. Munyń bári aǵa býynnan buryn jas urpaq úshin qajet», - deıdi Jaqsylyq Úshkempirov.

Eske sala ketsek,27 qazanda Qazaqstan Respýblıkasynyń Prezıdenti Nursultan Nazarbaev qazaq tili álipbıin kırıllıtsadan latyn grafıkasyna kóshirý týraly Jarlyqqa qol qoıǵan bolatyn.