Jaqsylyq Úshkempirov týraly kórkem fılmniń túsirilimi bastalǵaly jatyr
ALMATY. QazAqparat - Sh.Aımanov atyndaǵy «Qazaqfılm» kınostýdııasynda «Jeńimpaz» atty (jumys ataýy) kınojobanyń qorǵalymy ótti. Onda fılmniń shyǵarmashylyq toby atqarǵan jumystary týraly jáne túsirilimge daıyn ekendikterin jetkizdi, dep habarlaıdy QazAqparat.
Atalǵan sporttyq drama Qazaqstannyń Eńbek Eri, grek-rım kúresiniń palýany, Álem chempıony, Olımpıada chempıony, KSRO eńbek sińirgen sport sheberi (1980), Qazaq KSR eńbek sińirgen jattyqtyrýshysy - Jaqsylyq Úshkempirovtiń ómiri týraly baıandaıdy.
- Bul kórkem fılm janrynda túsirgeli otyrǵan meniń alǵashqy týyndym. Kartına 48 kg salmaqtaǵy Olımpıada chempıony bolǵan alǵashqy qazaq - Jaqsylyq Úshkempirov týraly. Ol túrli memleket dárejesindegi jarystarǵa qatysyp, júldeli oryndardan kórinse de, sportshyǵa halyqaralyq arenalarǵa shyǵýǵa múmkindik bermegen. Tek 1980 jyly ǵana ol Máskeýde ótken Olımpıada oıyndaryna qatysýǵa joldama alyp, álemdik deńgeıde ónerin kórsete aldy. Fılm Ońtústik Qazaqstan aýyldarynyń birinde dúnıege kelgen sportshynyń balalyq shaǵynan bastap, búkil Keńes odaǵy qoshemetpen qarsy alǵan palýannyń Olımpıada oıyndarynda jetken jetistikterine deıingi ómir jolyn beıneleıdi, -dedi fılmniń rejısseri Baqyt Qaıyrbekov.
Qatarynda kınorejısser Satybaldy Narymbetov, kınodramatýrg Smaǵul Elýbaı bar «Qazaqfılmniń» Eksperttik keńes músheleri aldynda túsirilim toby kórme uıymdastyrǵan. Onda fılmde qoldanylatyn rekvızıtter men keńes odaǵy dáýirindegi sporttyq kostıýmder qoıylǵan. Eksperttik keńes aldynda sóz alǵan fılmniń bas prodıýseri Tasbolat Merekenov túsirilimder Óskemen, Taldyqorǵan, Almaty jáne Almaty oblysynda júretindigin aıtty. Sonymen qatar, keı sahnalar Belarýsta ótetinin de habarlady. Aıta ketelik, fılmniń túsirilim jumystary shilediń 29 bastalyp, qyrkúıektiń sońyna deıin jalǵasady.
- Jaqynda ǵana Qytaıda ótken ShUY aıasyndaǵy kınofestıvalde «Qazaqfılm» men «Belarýsfılm» yntymaqtastyq týraly memorandýmǵa qol qoıǵan bolatyn. Osy is-sharadan soń, Mınskige túsirilim tobymen baryp, ondaǵy sport nysandaryn, 80-shi jyldardy eske salatyn qajetti rekvızıtterdi kórip qaıttyq. Mınskide 80-shi jyldardaǵy Máskeýge uqsaıtyn kósheler saqtalǵan eken. Onda zamanaýı jarnama, dúkender men meıramhanalar joq. Mınskidegi túsirilimder tamyz aıyna belgilengen, - dep qosty rejısser. 
Kastıng-dırektor Aıjan Dúısembaevanyń aıtýynsha, bıyl naýryz aıynda jarııalanǵan respýblıkalyq kastıngke 1000 astam jasóspirim men jetkinshek qatysqan. Uzaq foto jáne vıdeo synaqtan keıin basty rólge Elnar Nazarqul men Sanurjan Súleımenov bekitilgen. Olar Jaqsylyq Úshkempiriovtiń bala kezi men jetkinshek shaǵyn somdaıdy. Al teatr akteri Oljas Saq jigit shaǵyn oınaıtyn bolsa, Qazaqstannyń Halyq ártisi, Jezqazǵan teatrynyń akteri Dosjan Janbotaev 60- jastaǵy sportshynyń obrazyn jasaıdy.
