Jaqsylyq Úshkempirov: Qyzmetke kirisken Prezıdent ulttyq múdde men birlikke úlken mán berip otyr

NUR-SULTAN. QazAqparat - Birligi myqty bolǵan memlekettiń ǵana bolashaǵy baıandy. Búgin, maýsymnyń 12-si Nur-Sultan qalasynda ótken QR Prezıdenti Qasym-Jomart Toqaevty ulyqtaý rásimine baılanysty pikir bildirgen sport ardageri, olımpıada chempıony Jaqsylyq Úshkempirov osylaı aıtty.

«Búgin shynynda da tarıhı kún bolyp otyr. Saılaýda jeńiske jetken Qasym-Jomart Toqaevty aq kıizge kóterip, ulyqtadyq. Óte jaqsy rásim jasaldy. Sońynan Memleket basshysynyń sózin tyńdadyq. Odan ne túıdik? Eń birinshi Qazaqstannyń álemdik arenadaǵy bedeli tómendemeıdi dep oılaımyn, kerisinshe Toqaevtyń bedeli arqyly ol artady. Ol kisi qazaqtyń ulttyq múddesin álemdik arenada da, basqa jerlerde de qorǵaıtynyn málimdedi. Biz myqty memleket bola alamyz. Ekinshiden, bizdiń jastarǵa úlken úmit artylyp otyr. Jastar - bizdiń keleshegimiz. Osy rette aıtatynym qazaq eli - eshqashan eshkimnen kem bolǵan emes. Ony sol deńgeıde ustap turý jastardyń qolynda», - dedi Jaqsylyq Úshkempirov.

Onyń aıtýynsha, aýyzbirshilik bolǵanda ǵana ult tutastaı tabysqa jetedi. Ótken tarıhtyń ózinde de aýyzbirshiligi bolǵanda qazaqtyń jaǵdaıy myqty, memleketi qýatty bolǵanyn kórsetken.

«Ekinshi jaǵynan jastardyń ózderi de eńbekker bolýy kerek. Men olımpadaǵa chemıpon bolǵanyma kóp jastar qyzyǵady, al oǵan jetýdiń birden bir joly - eńbek. Sony umytpasa eken deımin. Biraq, qalaı bolǵanda da birlik pen yntymaq bolmaı, elimiz alǵa basa almaıdy. Birligi myǵym memlekettiń bolashaǵy da baıandy», - dedi Jaqsylyq Úshkempirov.