Jaqsylyq Úshkempirov Qordaıdaǵy janjalǵa baılanysty halyqty sabyrǵa shaqyrdy

«Táýelsizdik alyp, qandaı memleket ekenimizdi búkil dúnıe júzine tanytyp jatyrmyz. Bárimiz tatý-tátti ómir súrip jatyrmyz. Kesheden beri Jambyl oblysyndaǵy oqıǵany estidim. El bolǵannan keıin ártúrli jaǵdaı bolady. Bizdiń babalarymyz qanshama ǵasyr boıy qıynshylyqty basynan keshirdi. Babalarymyzdyń ár ýaqytta óziniń ustamdylyǵymen, sabyrlyǵymen, danalyǵymen, aýyzbirshilikpen eldi ustap otyrǵanyn umytpasaq deımin», - dedi Jaqsylyq Úshkempirov.

Qazaqstannyń Eńbek Eri ózi árdaıym aýyzbirshilikpen, yntymaqty qalaıtynyn jetkizdi.

«Men otyz jasymda Olımpıada chempıony boldym. Qansha jyl sabyrlylyqtyń arqasynda qıynshylyqtardy bastan ótkerdik. Qazaǵymnyń myqtylyǵynyń arqasynda men sondaı bıikke kóterildim. Sol sebepti bárimiz sabyrlylyq saqtaı otyryp, osyndaı kıkiljińdi birge toqtatyp, jastarǵa úlgi bolatyndaı sóz aıtyp, qazaqtyń yntymaqsúıgish el ekenin kórsetýimiz kerek», - dedi ol.

Jaqsylyq Úshkempirov jastardyń óz keleshegin oılaýy kerektigin jetkizdi.

«Ózimiz búldirip jatsaq, keıingi býynǵa qandaı tárbıe beremiz. Barlyq qıynshylyq jaǵdaıda sabyrmen ortaq sheshimge keleıik. Elim men jurtym aman bolsyn. Úlkendi qurmettep ósken halyqpyz. Sondyqtan aqsaqaldarymyzdy tyńdap, bir-birimizge tek jastarǵa úlgi bolarlyq is kórsete bilýimiz kerek dep oılaımyn. Elimiz aman, jurtymyz tynysh bolsyn», - dedi ol.

Buǵan deıin Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz.

Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirdi.

«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter-degi paraqshasynda.

Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.