Jaqsylyq Dosqalıevtiń uly QazUMÝ-dyń klınıkalyq jumystar jónindegi prorektory qyzmetine taǵaıyndaldy

ASTANA. QazAqparat - QR Densaýlyq saqtaý jáne áleýmettik damý mınıstriniń buıryǵymen QazUMÝ rektorynyń mindetin atqarýshynyń usynýymen 34 jastaǵy Aıdos Dosqalıev osy oqý ornynyń klınıkalyq jumystar jónindegi prorektory qyzmetine taǵaıyndaldy, dep habarlady JOO baspasóz qyzmeti.

Aıdos Jaqsylyquly Dosqalıev 1982 jyly Aqtóbe oblysynyń Alǵa qalasynda dúnıege kelgen.

Joǵary medıtsınalyq bilimi bar, 2005 jyly S.D.Asfendııarov atyndaǵy Qazaq ulttyq medıtsına ýnıversıtetin bitirgen. 2006 jyly Almaty qalasyndaǵy №7 qalalyq klınıkalyq aýrýhana bazasynda neırotravmatologııa, pedıatrııa jáne neıroonkologııa bólimshelerinde Qazaq memlekettik medıtsına akademııasynyń ınternatýrasyn bitirdi.

2006-2010 jyldary - «Bolashaq» halyqaralyq baǵdarlamasynyń stıpendıaty. 2006-2011 jyldary Japonııadaǵy Hırosıma ýnıversıtetiniń Neırohırýrgııalyq bólimshesinde PhD baǵdarlamasy boıynsha oqýdan ótti.

2011 jyldan Ulttyq neırohırýrgııa ortalyǵynyń (Astana) ortalyq nerv júıesi patologııasy bólimshesinde neırohırýrg-dáriger bolyp qyzmet atqardy.