Jaqsylyq Dosqalıev tegin medıtsınalyq kómektiń jańa úlgisin túsindirip berdi
ASTANA. QazAqparat -QR Prezıdenti Nursultan Nazarbaev búgingi Joldaýynda memlekettiń mindetterin naqty belgileı otyryp, tegin medıtsınalyq kómektiń kepildik berilgen kóleminiń jańa modelin ázirleýdi tapsyrdy, dep habarlaıdy QazAqparat tilshisi.
Akademık Jaqsylyq Dosqalıevtiń aıtýynsha, mindetti áleýmettik medıtsınalyq saqtandyrý júıesi aıasynda tegin medıtsınalyq kómektiń kólemin ózgertýge týra keledi.
«Qazirgi kezde tegin medıtsınalyq kómek bar. Oǵan memlekettiń ózi kepildik berip otyr. Onyń quramyna barlyq medıtsınalyq qyzmetter kiredi. Bylaısha aıtqanda, búginde ol qyzmettiń bári bıýdjet esebinen atqarylady. Al mindetti áleýmettik medıtsınalyq saqtandyrý júıesin engizgende kepildendirilgen medıtsınalyq kómek shegeriledi. Óıtkeni keıbir medıtsınalyq qyzmetter bıýdjetten emes, arnaıy medıtsınalyq qordan tólenedi», - dedi J.Dosqalıev QazAqparat tilshisine bergen suhbatynda.
Ǵalymnyń aıtýynsha, tegin medıtsınalyq kómek shegerilse de, onyń negizgi baǵyttary qala beredi. «Birinshiden, adam ómirine qaýip tóngende tegin medıtsınalyq kómek kórsetiledi. Ondaıda saqtandyrý kýáligiń bar ma, joq pa, eshkim suramaıdy. Óıtkeni adamdy qutqarý qajet. Ekinshiden, ınfektsııalyq aýrýlar kezinde tegin qyzmet bolady. Sosyn týberkýlez sııaqty aýrýlar bar. Ony da memleket óz moınyna alyp otyr. Úshinshiden, san alýan psıhıkalyq aýrýlar kezdesedi. Budan bólek, vaktsınatsııa, skrınıng, orfandy, ıaǵnı sırek kezdesetin aýrýlar, tegin dáriler jáne taǵy basqa sharalar bıýdjettiń esebinen atqarylady. Prezıdenttiń aıtyp otyrǵany da sol, kimge, qandaı jáne qaı kezde tegin medıtsınalyq kómek beriledi. Sonyń bárin retke keltirý kerek. Qalǵan mindetti áleýmettik medıtsınalyq saqtandyrýǵa berip tastaýǵa bolady», - dep atap kórsetti J.Dosqalıev.
Aıta keteıik, «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýda Memleket basshysy ǵylymı onkologııalyq ortalyqty qurý mindetin de belgiledi. https://kaz.inform.kz/news/prezident-aytkan-onkologiyalyk-ortalyk-astanada-salynuy-kazhet-doskaliev_a3118898
