Jaqsylyq Dosqalıev ózi bilim alǵan medýnıversıtetke altynnan jasalǵan karta syılady
AQTÓBE. QazAqparat - Aqtóbe medıtsınalyq ýnıversıtetiniń túlekteri bilim ordasynyń 60 jyldyǵyna jınaldy. Akademık Jaqsylyq Dosqalıev ózi bilim alǵan medıtsınalyq ýnıversıtetke 24 karatty altyn karta syılady, dep habarlaıdy QazAqparat tilshisi.
Aqtóbe qalasynda Marat Ospanov atyndaǵy Batys Qazaqstan medıtsınalyq ýnıversıtetiniń 60 jyldyq mereıtoıy ótip jatyr. Sharaǵa joǵary oqý ornyn bitirgen túlekter shaqyryldy. Olardyń arasynda Respýblıkalyq transplantologııa úılestirý ortalyǵynyń dırektory Jaqsylyq Dosqalıev te bar. Akademık ózine tálim bergen oqytýshylarǵa alǵys aıtyp, syı jasady.
«Adamnyń sana-sezimi, ishki jylýy, adamnyń alǵa jyljýy, bir-birin súıýi sekildi qasıetterdiń bári ýnıversıtte darıdy. Ustazdaryma alǵysym sheksiz. «Uıada ne kórseń, ushqanda sony ilesiń» degen bar. Oqytýshylardan alǵan tálim-tárbıe ómirimizge azyq boldy. Men Aqtóbe medıtsınalyq ınstıtýtynda bilim alǵanymdy, jumys ornyn osy jerde assıstent bolyp bastaǵanymdy, bilim ordasyn basqarýǵa múmkindik berilgenin maqtan etemin. Oqytýshylarymmen, ýnıversıtetti bitirgen 25 myń túlekpen maqtanamyn. Olardyń bári elimizdiń ár óńirinde, shetelde Aqtóbe ýnıversıtetin tanytyp júr. Bul JOO óz ádistemesi, joly bar. Túrli seriktester baılanys ornatyp, Aqtóbe ýnıversıtetiniń tájirıbesin meńgerip júr. Bári ujymnyń eńbegi»,- dedi Jaqsylyq Dosqalıev. Sońynan akademık syı jasady. Ol Marat Ospanov atyndaǵy Batys Qazaqstan medıtsınalyq memlekettik ýnıversıtetiniń túlekteri jumys istep júrgen Qazaqstan kartasynyń altyn úlgisin syılady. Altyn synamasy - 24 karat.
