Jaqsylyq Dosqalıev eki búıregin bergen Serikbolsynnyń otbasyna kóńil aıtyp barmaq
AQTÓBE. QazAqparat - Aqtóbede máıittik donorǵa qatysty túsinik bergen Ulttyq transplantatsııany úılestirý ortalyǵynyń dırektory Jaqsylyq Dosqalıev Serikbolsyn Kósherbaıdyń otbasyna baryp, kóńil aıtatynyn jetkizdi, dep habarlaıdy QazAqparat tilshisi.
Aqtóbe oblysy, Baıǵanın aýdany, Altaı batyr aýylynyń turǵyn Serikbolsyn Kósherbaı bas-mı jaraqatyn alyp, otadan soń es jımaı, aýrýhanada kóz jumdy. Buǵan deıin habarlaǵanymyzdaı, 22 jastaǵy jas jigittiń qos búıregi naýqastarǵa salynyp, arnaıy ota jasalǵan. Serikbolsyn Kósherbaıdyń týǵan-týystary donor bolyp, eki adamǵa ómir syılaǵanyn bilmeı, oblystyq densaýlyq saqtaý basqarmasy men oblystyń bas hırýrgi Erlan Sultangereevti sotqa berdi . Al búgin osy oqıǵa týraly «Aqtóbe aqparat» ortalyǵynda Ulttyq transplantatsııany úılestirý ortalyǵynyń dırektory Jaqsylyq Dosqalıev túsinikteme berdi. «Dáriger ǵana emes, búkil halyq bolyp jınalyp, jubatýymyz kerek. Dárigerler qoldan kelgenniń bárin jasady. Baıǵanınniń aýrýhanasynda kómek jasaldy, keıin Aqtóbe qalasyna aýystyryldy. Dárigerler kúndiz-túni qoldan kelgenin jasady. Mıy ólip ketkennen keıin ony qaıtarý múmkin emes. Men baryp, basymdy ıemin. Sol úshin keldim»,- dedi Jaqsylyq Dosqalıev.
Aıta keteıik, elimizde 2012 jyldan beri máıittik donor qolǵa alyndy. Sol jyly bir adamnyń júregi aýystyryldy. Al 2015 jyly 22, 2016 jyly 16 naýqasqa qaza bolǵan adamnyń dene múshesi salyndy. Jyl basynan beri 11 adamǵa máıittik donor arqyly ota jasaldy. Al tiri adamnyń aǵzasyn salý salasy elimizde jaqsy damyp keledi. Máselen, 2012 jyly 63 adamǵa týǵan-týystary donor boldy. Ótken jyly bul kórsetkish 248-ge jetken.
«Eger adam tiri kezinde donor bolýǵa qarsymyn dep jazyp, tirkelmese, Halyq densaýlyǵy jáne densaýlyq saqtaý júıesi kodeksine sáıkes mıy ólgen jaǵdaıda onyń azǵasyn esh kelisimsiz alýǵa bolady. Arnaıy ruqsat suraýdyń qajeti joq. Bul basty zańnama 2009 jyly qabyldanyp, 2016 jyly ózgertýler men tolyqtyrýlar engizildi. Bul birinshi oqıǵa emes. Qazaqstanda boldy, erteń de bola beredi. Adamnyń aǵzasyn alý ońaı jumys emes. Mıy ólgen adamnan birneshe analız alynady. Tekserýden soń sáıkes kele me, joq pa degen suraqqa jaýap izdeledi. Qazir elimiz boıynsha 3 500-den astam adamǵa donor qajet. Olardyń búıregi, júregi, ókpesi, baýyry apparatqa qosýly. Sondyqtan bul jaǵdaıdy ýshyqtyrmaı, adamdarǵa túsindirý jumysyn júrgizý kerek. Bizdiń dinimiz, zańymyz adam aǵzasyn adamǵa salýǵa qarsy emes»,- dedi Jaqsylyq Dosqalıev.
