Jaqsylyq Dosqalıev aqtóbelikterge tegin ota jasady
AQTÓBE. QazAqparat - Aqtóbede ótetin jerlester forýmy aıasynda akademık Jaqsylyq Dosqalıev týǵan jeri Alǵa aýdanynda úsh adamǵa ota jasady, dep habarlaıdy QazAqparat tilshisi.
Aqtóbege kelgen QR Ulttyq transplantatsııa ortalyǵynyń dırektory Jaqsylyq Dosqalıev týǵan jeri Alǵa qalasynda ota jasap jatyr. Alǵa aýdandyq aýrýhanasyndaǵy sheberlik sabaǵy aıasynda laparoskopııalyq ota jasalyp, otadan keıingi em joldary kórsetildi. Dosqalıev óz sapary kezinde aýyl turǵyndaryna keńes berdi. Aqtóbe oblystyq densaýlyq saqtaý basqarmasy baspasóz qyzmetiniń habarlaýynsha, forým kezinde Aqtóbege 22 dáriger kelip, sheberlik sabaqtaryn ótkizedi, medıtsına qyzmetkerlerimen kezdesedi. Máselen, kóz dárigeri Madına Quralova tegin ota jasaıdy. Bul jumysyn ol 2011 jyly bastaǵan.
Aqtóbedegi forýmǵa Jubanovtar áýletiniń urpaqtary da keldi. Oblys ortalyǵynda kásipker Qaırat Máıtekovtyń demeýshiligimen Jubanovtar álemi mádenıet ortalyǵy salynyp jatyr. Bul qarapaıym mýzeı emes, ǵylymı ortalyq bolady.
«Ǵalym, lıngvıst Qudaıbergen Jubanov, kompozıtor Ahmet Jubanov, Ǵazıza Jubanovanyń ómiri men ónerin dáripteýge arnalǵan Jubanovtar álemi mádenıet oshaǵy bizder úshin qundy nysan. Urpaqtar sabaqtastyǵy jalǵasyp jatyr. Biz Almaty, Astana qalalarynda turǵanymyzben jastardy shaqyryp, óner, ǵylym jolyndaǵy tájirıbemizben bólise alamyz. Jubanovtar áýleti kez kelgen kómekti berýge daıyn. Bárimiz pedagogpyz. Aldaǵy ýaqytta sheberlik sabaqtaryn ótkizýge atsalysamyz»,- dedi Ardaq Jubanova.
