Jaqsybekov pen Jámishev Astanada ótetin qysqy marafonǵa qatyspaq
ASTANA. QazAqparat - Astanada 24 jeltoqsanda tuńǵysh ret ótetin «AstanaWinter Marafon: múmkindik sheginen tys» marafonyna bıliktegi birshama laýazymdy adamdar qatysady.
Bul týraly OKQ-da ótken baspasóz máslıhatynda qysqy marafondy uıymdastyrýshylardyń biri, áıgili qazaqstandyq marafonshy Marat Jylanbaev málim etti, dep habarlaıdy «QazAqparat» HAA tilshisi.
Qysqy marafonǵa kóppen birge QR Prezıdent Ákimshiliginiń basshysy Ádilbek Jaqsybekov, «Qazaqstannyń Damý banki» AQ basqarma tóraǵasy Bolat Jámishev atsalyspaq.
«Biz marafonǵa qatysýshylardyń sanyn 300-ge deıin qysqarttyq. Tek daıyndyǵy myǵym sportshylar ǵana keledi. Vıp adamdar da bar. Marafonǵa Ádilbek Jaqsybekov, Bolat Jámishev, Aıdyn Rahymbaev, Batyrbek jáne Baǵdat Mýsınder qatysady», -deıdi Marat Jylanbaev.
Áıgili sportshynyń aıtýynsha, tuńǵysh marafon Astanadaǵy Trıatlon baǵynda ótedi.
«Bir jyl buryn Trıatlon baǵy ashylǵan edi. Qýanarlyǵy, ol jerde tańǵy 6-dan bastap arnaıy tehnıkalar qardy kúrep tastap otyrady. Tipti qaladaǵy joldardy olaı tazalamasa da, Trıatlon baǵy kúreýsiz qalǵan emes. Marafonshylarǵa degen osynaý qurmetti erekshe atap ótkim keledi. Bizdiń qysqy marafon da sol jerde ótedi. Marafon barysynda ol jerde jedel járdem qyzmeti bolady. Órt sóndirýshiler men tótenshe jaǵdaı qyzmetiniń mamandary sol jerde adamdardyń qaýipsizdigin baqylamaq. Shákirtterim arnaıy ishi jyly kıiz úılerdi daıyndap otyr. Sonda qatysýshylar sporttyq kıimin kıinip, jylyna alady», - deıdi Marat Jylanbaev.
Aıta ketsek, jarysty úsh qashyqtyqta ótkizý josparlanyp otyr. Naqtyraq aıtqanda, qatysýshylar 42, 21 jáne 10 shaqyrymda júgiredi. Marafonǵa qatysýǵa nıet bildirgender www.marathonclub.kz saıtynda 12-20 jeltoqsan aralyǵynda tirkelýi kerek. Jeńimpazdarǵa kýbokter men baǵaly júldeler tabystalady.
