Jaqsybekov Astananyń aıazdy kúnderi Elbasynyń aıtqan sózderin eske aldy

Aıta keteıik, Ádilbek Jaqsybekov 1997-2003 jáne 2014-2016 jyldary aralyǵynda Astana qalasynyń ákimi bolǵan. 1994 jyly elordany aýystyrý sheshimi jarııalanǵanda ol Aqmolada bıznespen aınalysyp júrgen.

«Osy jerde óstim, meniń týǵan qalam osy. Astananyń kóshiriletini týraly jańalyqty meniń jer­lesterim úlken qýanyshpen ári úmit­pen qarsy aldy. Bári de astana már­tebesimen birge Aqmolaǵa jańa ómir keledi dep kútti. Biraq ol kezde men, árı­ne Memleket basshysy sheshiminiń me­niń taǵdyrymdy sonshalyqty ózger­te­ti­nin bilgen joqpyn. Ony aıtasyz, búkil eldi, kúlli qazaqstandyqtar taǵdyryn ózgerterin kim bilgen», - dep eske aldy Ádilbek Jaqsybekov «Egemen Qazaqstan» gazetinde jarııalanǵan «Astana - Qazaqstan táýelsizdiginiń nyshany» maqalasynda.

Biraz ýaqyt ótken soń Ádilbek Jaqsybekov Qazaqstan kásipkerleriniń alǵashqy býynynyń ókili retinde Senat depýtaty bolyp saılanǵan. Parlamentte naryqtyq reformany zańnamalyq turǵydan qamtamasyz etýde jumys istegen.

«1996 jylǵy qyrkúıektiń bir kúni aıaq astynan Prezıdent Ákimshiligine shaqyrtý aldym. Aqmola oblysynda ákimniń birinshi orynbasary laýazymy engizilip, ol jańa astananyń ekonomıkasy men qurylysyna jaýap beretin boldy. Memlekettik qyzmetshi retinde baǵymdy synap kórýime múmkindik berildi. Kóp oılanbastan, árıne kelistim. Bul uly iske óz úlesińdi qosý múmkindigi ekeni aıdan anyq edi. Shaıqalyp júrmesten, jumysqa birden kirisip ketýge týra keldi», - dep jazdy ol. 

Jaqsybekovtyń aıtýynsha, Astanany kóshirýdiń merzimi 1997 jyldyń sońy dep naqty belgilendi jáne Aqmolada negizgi nysandardyń aýqymdy qurylysy bas­talyp ketti. Memlekettik organdardy ornalastyrý, tur­ǵyn úıler salý kerek boldy. Qala ınfra­qurylymy boıynsha kóptegen máseleler sheshilmegen. Joldar, kommýnıkatsııa, energetıka - bári óte nashar kúıde bolǵan. 

«Memleket basshysy Aqmolada turaq­ty bolyp turdy, qurylysqa tike­leı basshylyq jasady, árbir jaı­dyń egjeı-tegjeıine deıin uǵyndy. Prezı­de­nt­pen qatar jumys isteý men úshin asa zor kásibı ári ómirlik mektep boldy. Nursultan Ábishuly qarqynǵa qarqyn qosty, al biz bar kúshimizben odan qalmaýǵa tyrystyq. Kedergiler men qıyndyqtar, árıne árbir qadam saıyn kezdesti. Onyń ústine, olardy - nysandardyń eskilerin de, jańadan qosylǵandaryn da energııamen, telefonmen qamtamasyz etý, kommýnıkatsııa qubyrlaryn tóseý jáne basqa tolyp jatqan mindetterdi - qysqa merzim ishinde eńserý qajet boldy», - deıdi Astananyń alǵashqy ákimi.

Sonymen birge, Ádilbek Jaqsybekov Astananyń aıazdy kúnderi júrgizilgen qurylys jumystaryn eske aldy.

«Tabıǵattyń ózi de áýseleńdi kóreı­in degendeı synaı tústi. 1996-1997 jyldardaǵy qys asa sýyq boldy. Alaı­da sol aıazdarǵa qaramastan, jumys bir sát te toqtaǵan emes. Mynadaı bir kórinis oıymda qalyp­ty. Temperatýra mınýs 30-dan asyp ketken, onyń ústine qatty jel. Bárimiz salynyp jatqan turǵyn úı­diń janynda jel yzǵarynan búrisip turmyz. Nursultan Ábishuly keldi, jan-jaǵyna qarap: qalaı-qalaı soǵady, á! - dedi. Bizdiń bárimiz búrisip: oı, aıtpańyz, aıtpańyz! - dedik. Al ol dym bolmaǵandaı, bizdiń sózimizdi estimegen syńaı tanytyp: qalypty jaǵdaı, bul jerlerde únemi jel bolyp turady, sondyqtan aýasy da taza! - dep sózin jalǵady. Osy sózderden keıin bárimiz de jylynyp sala berdik, ár jerden: soǵa bersin, bári de jaqsy degen daýystar shyǵyp jatty», - dep jazdy Ádilbek Jaqsybekov.