Jaqsy zańdar qabyldanǵanymen, ony oryndaý jaǵy kemshindeý - Q. Aıtahanov
ASTANA. 19 jeltoqsan. QazAqparat - Jaqsy zańdar qabyldanǵanymen, ony oryndaý jaǵy kemshildeý. Búgin Parlament Senatynyń jalpy otyrysynda senator Qýanysh Aıtahanov osylaı málim etti. Eske sala keteıik, jıyn barysynda «Qazaqstan Respýblıkasynyń keıbir zańnamalyq aktilerine agroónerkásiptik keshen máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn.
Talqylaý barysynda senator Q. Aıtahanov zańnyń agroónerkásip keshenin damytý isinde mańyzdy ekenin, sondyqtan da onyń oryndalýyna basa mán berý kerektigin alǵa tartty. «Bizde kóp jaǵdaıda jaqsy zańdar qabyldanady, al ony iske asyrýǵa baǵyttalǵan Úkimet qaýlylary men atqarýshy organdardyń buıryqtary, erejeleri keshigip shyǵady nemese sapasyz, oryndaýshylar úshin túsiniksiz kúıde qabyldanyp, bul zań normalarynyń oryndalmaýyna ákep soǵady», - deıdi depýtat. Onyń sózine qaraǵanda, qabyldanǵan baǵdarlamalar da, zańdar da óńirdegi oryndaýshylarǵa tereń túsindirilmeıdi, jergilikti jerlerge ondaǵy jańalyqtar kóbinese jetpeı de jatady. Sonyń saldarynan tıisti dárejede qabyldanǵan zańdardyń ózi jumys istemeı jatady.
«Máselen, Úkimet qabyldaǵan «Agrobıznes-2020» baǵdarlamasynda agroónerkásip sýbektilerin qoldaý tetikteri jan-jaqty qamtylǵan. Qyrýar qarjy qarastyrylǵan. Alaıda, óńirlerde jurtpen kezdesýde baıqaǵanymyz, baǵdarlamanyń qabyldanǵanyna bir jyldaı ýaqyt ótse de, onyń negizgi baǵyttaryn, memlekettiń sharýalarǵa jasap otyrǵan jeńildikterin aýyl turǵyndary, kerek deseńiz aýyl ákimderiniń ózderi de tolyq bile bermeıdi. Al memlekettiń qamqorlyqtary men jeńildikterin bilmese sharýalar ondaı qoldaýlardan tys qalyp qalmaı ma? Túptep kelgende bul salanyń damýyna keri áserin tıgizedi», - deıdi depýtat Aıtahanov.
Bul rette senator Aýyl sharýashylyǵy mınıstrliginiń ǵana emes, jergilikti atqarýshy organdardyń jaýapkershil bolýy kerektigin atap ótti. Onyń aıtýynsha, jergilikti organdar Úkimet qabyldaǵan baǵdarlamalardy, zańdardy jurtshylyqqa, sharýalarǵa barynsha jetkizip, tereń túsindirýleri kerek.
