Jaqsy oqyǵan bala esh ýaqytta aqyly oqýǵa túspeıdi - Saparbaev

Aqtóbe oblysynyń ákimi Berdibek Saparbaevtyń esebine kelgen aqtóbelikter Ardagerler úıin, Jastar úıin surady.  Óńirde 90 myńnan astam ardager bar ekenin aıtqan Ǵalym Dáýletalın bas qosyp, keńesetin oryn qajet ekenin jetkizdi.

«Bul suraq belgili. Aldymen balalarǵa, jarymjan jandarǵa kómek beremiz. Emhanany bosatyp,ony Ardagerler úıi dep jabdyqtaýǵa bolady. Biraq biz jospar boıynsha jańa ǵımarat salamyz. Bul aldaǵy jyldardyń jospary», - dedi óńir basshysy Berdibek Saparbaev.

Aqtóbelikter arasynda áleýmettik jaǵdaıyn aıtyp, baspana suraǵandar da boldy.

«Otbasymda úsh múgedek jan bar. Eki balam №7 arnaýly mektepte oqıdy, al jubaıym ІІ top múgedegi. Ákimshilik maǵan bir bólmeli baspana berdi. Sol úıde jeti bala turyp jatyrmyz. Ulym sport salasynda aqyly túrde bilim alyp jatyr. Maǵan qazir qıyn. Sondyqtan kezek kelgenshe keń baspana berýińizdi suraımyz», - dedi Altyn alqa ıegeri, 8 balanyń anasy Saltanat Sadýova.

Bul otbasynyń áleýmettik jaǵdaıymen oblys ákimi Berdibek Saparbaev tanys. Kópbalay ananyń ótinishin tyńdaǵan óńir basshysy bári zań aıasynda atqarylatynyn jetkizdi. Sonymen qatar, balany aqyly túrde oqytpas úshin ony kishkentaıynan tárbıeleýge keńes berdi.

«Qazirgi kezde tek Aqtóbe qalasynda 24 myńnan astam adam páter kezeginde tur. El zańyna sáıkes, baspana kezekpen beriledi. Men siz týraly bilemin. Aýdannan kóship kelip, baspana suradyńyz. Qalalyq ákimdik ýaqytsha páter berdi. Ózgesi kezekpen bolady. Balalardy aqyly oqytý jóninde túsinispeýshilik bar. Kóp kezdesýde «balam aqyly oqyp jatyr, zeınetaqymdy beremin» deıdi. Meniń jaýabym daıyn. Ol úshin bala jaqsy oqýy kerek. Jaqsy oqyǵan bala aqyly oqýǵa túspeıdi. Bizdiń kemshiligimiz -ata-ana balanyń oqýyna, tártibine asa mán bermeıdi. Mektep bitirgen soń «dıplom alsyn» dep aqyly oqýǵa túsiremiz. Ol durys emes. Bastysy - balanyń jaqsy bilim alýyn qadaǵalańyz», - dedi óńir basshysy Berdibek Saparbaev.