Jaqsy dástúr ǵoı - Mınıstrlik sońǵy qońyraýda ustazdarǵa gúl syılaýǵa bolatynyn aıtty

NUR-SULTAN. QazAqparat - Bıyl pandemııadan keıin alǵash ret 25 mamyrda sońǵy qońyraý saltanatyn ótkizýge ruqsat berildi. Degenmen restoranda mektep bitirý keshin ótkizýge tyıym salynǵan, dep habarlaıdy QazAqparat.

Sondaı-aq Bilim jáne ǵylym mınıstrligi túlekterdiń ustazdaryna syılyq jasaýyna bolmaıtynyn atap ótti.

Mektep ákimshiligi men muǵalimderge syılyq alý úshin aqsha jınaýǵa, oıyn-saýyq mekemelerinde bitirý keshin uıymdastyrýǵa ruqsat joq.

Dese de, sońǵy qońyraýda pedagogtarǵa gúl syılaýǵa bolady.

«Jyl saıyn 1 qyrkúıek nemese 25 mamyr qarsańynda «Muǵalimge gúl syılaýǵa bola ma, bul zańbuzýshylyq bolyp sanalmaı ma?» degen suraq týyndaıdy. Bizdiń ustanymymyz - ıá, bolady. Bul jaqsy dástúr ǵoı», - deıdi mektepke deıingi jáne orta bilim komıtetiniń tóraıymy Gúlmıra Kárimova.

Aıta keteıik, Qazaqstannyń barlyq mektebinde sońǵy qońyraý merekesi 25 mamyrda ótedi.

Al attestatty saltanatty tapsyrý rásimi 16-17 maýsymǵa belgilengen.