Jaqsy bilim alý úshin shetelge barý mindetti emes - mońǵolııalyq stýdent
ALMATY. Sáýirdiń 8-ci. QazAqparat /Erlik Erjanuly/ - Jaqsy bilim alý úshin stýdentke eń aldymen zeıin kerek. Onysyz etken eńbektiń bári zaıa bolýy múmkin.
Bul búgin Almatyda ótip jatqan «Qazaqstan halyqaralyq bilim keńistiginde» dep atalatyn stýdentterdiń ІІ Halyqaralyq ǵylymı konferentsııasynda aıtyldy, dep habarlaıdy QazAqparat.
«Men Qazaqstanǵa 2005 jyly keldim. Qazir Almatydaǵy Qazaqtyń Abaı atyndaǵy ulttyq pedagogıka ýnıversıtetiniń daıyndyq fakýltetinde 4-shi kýrsta oqımyn. Osynda bilim alyp jatqanyma rızamyn. Oqytýshylarymyz óte jaqsy. Bizge kómektesip turady. Ázirge qandaı da bir mamandyqty tańdaǵan joqpyn. Biraq jýrnalıst bolǵym keledi. Búgingi tańda Almatyda Mońǵolııadan kelgen 5 stýdent bar. Bireýi QazUPÝ-da, qalǵan úsheýi Qazaqtyń Ulttyq agrarlyq ýnıversıtetinde oqıdy», deıdi Chýlýýnerdene Chýlýýnbaatar. Búgin ol daıyndyq fakýltetindegi 4-shi kýrs tálimgerleri arasynda «Úzdik stýdent» atalymy boıynsha oqý orny basshylyǵy tarapynan arnaıy marapatqa ıe boldy. Onyń paıymdaýynsha, jaqsy bilim alý úshin mindetti túrde shetelde oqý kerek degen durys emes. Stýdent aqyldy bolsa ony óz elinde de meńgere alady. Bul úshin onyń boıynda zeıin, ynta jáne jiger bolý kerek.
«Mońǵolııada da qazaqtar bar. Áıtse de buryn qazaq tilin úırenýge mán bermeıtinmin. Qazaqstanǵa kelgen kezde 1-2 kýrsta ǵana qazaq tilin oqydyq. Ulttyq taǵamdarda uqsastyq bar eken. Bizde de qazanǵa et pisiredi. Jalpy maǵan Almatyda erekshe unaǵan nárse - aǵashtardyń kóptigi boldy», deıdi ulanbatorlyq Chýlýýnerdene.
