Jaqsy baıandama jasaýdy úırengen Eńbek mınıstrligi jaqsy jumys isteýge basa nazar aýdarýy qajet - Memlekettik hatshy
ASTANA. 23 shilde. QazAqparat - Búgin Eńbek jáne halyqty áleýmettik qorǵaý mınıstrliginiń alqa májilisine qatysqan QR Memlekettik hatshysy Muhtar Qul-Muhammed vedomstvonyń jumysyn synady.
«Qurmetti áriptester, eń aldymen slaıdtarmen, ádemi tsıfrlarmen jaqsy baıandama jasaýdy jetik meńgergen ekensizder. Biraq jaqsy jumys isteý jaqsy baıandama jasaǵannan artyǵyraq bolady, - dep bastady sózin Memlekettik hatshy. - Sizderdiń vedomstvolaryńyz Eńbek mınıstrligi bolǵannan keıin eń birinshi sizder adamdardy eńbekpen qamtamasyz etý máselesimen aınalysýlaryńyz kerek. Ekinshiden eńbegine saı eńbekaqyny ýaqytynda alý, ýaqytynda berý máselesin sheshý sizderdiń basty mindetterińiz bolýy tıis. Odan keıingi kezekte - járdemaqy, basqa áleýmettik tólemdermen qamtamasyz etý. Eń birinshi eńbek jáne eńbekke saı eńbekaqy bolýy kerek».
Onyń paıymynsha, áleýmettik janjaldar eń aldymen jalaqy almaýdan bastalady. Máselen, bir otbasynyń asyraýshysy 1-2 aı boıy jalaqy almaıtyn bolsa, onda sol januıada dúrdarazdyq týyndaıdy. Mine osy máselerge jol bermeý, ıaǵnı jumyspen qamtý ári der ýaqytynda olardyń jalaqy alýlaryn jiti qadaǵalaý vedomstvonyń basty nazarynda bolýy tıis.
Bul oraıda qazirgi ýaqytta el kásiporyndarynyń jumysshylar aldynda 2 mlrd. teńgege jýyq qaryzy bar ekendigine alańdaýshylyǵyn bildirgen M.Qul-Muhammed: «Eger ekonomıkada daǵdarys bolyp jatsa, onda basqasha. Bizdiń birinshi jartyjyldyq boıynsha ekonomıkalyq kórsetkishimiz 5,5 paıyzǵa ósip otyr. Dál osyndaı jaǵdaıda bizdiń eńbekaqydan qaryzymyzdyń bolýy onsha jaqsy másele emes»,- dedi.
Sonymen qatar Memlekettik hatshy «Jumyspen qamtý -2020» baǵdarlamasy aıasynda aýyldyq ınfraqurylymdy damytý qolǵa alynǵandyǵyn, alaıda birqatar oblystarda oǵan bólingen memlekettik qarjysynyń «soqyr tıyny da» ıgerilmegendigin synǵa aldy.
