«Jaqsy adamdarym» jyl úzdikterin tańdaıdy – Jibek Joly

ASTANA. QazAqparat – Qazaqstanda ár sala boıynsha jyl úzdikteri anyqtalyp «Jaqsy adamdarym» atty jańa jyldyq syılyǵy tabys etiledi, dep habarlaıdy QazAqparat tilshisi.

Jibek Joly telearnasy usynǵan «Jaqsy adamdarym» jobasynyń maqsaty - jyl boıyna ár salada jetistikke jetken, el yqylysyna bólengen, qaıyrymdylyq jasap, áleýmettik jelide tanymal bolǵan jandarǵa qurmet kórsetý. Sondaı-aq, erlik jasaǵan azamattardy kópshilikke úlgi etý, nasıhattaý.

Atalǵan baǵdarlamanyń júrgizýshileri elimizge tanymal ónerli jup – Qydyráli men Qaraqat.

«Halyq ishinde qurmet tutatyn óz batyrlary bolady. Shyny kerek, qazir áleýmettik jeliniń zamany. Bir dúnıeni haıp nemese qarabasy úshin jasaıdy. Al bul halyq arasyndaǵy azamattyq is. Mysaly, órttiń ishinen týdy alyp shyqqan shymkenttik jigit. Olardy biz «Jaqsy adamdar» nomınatsııasynda quttyqtaımyz. Erlik tanytqan jandardyń batyrlyǵyn, azamattyq isin kópshilikke dáripteý kerek», - dedi QR Prezıdenti teleradıokesheni bas dırektorynyń orynbasary Tilegen Ábishev.

Halyq batyrlaryn otandyq estrada juldyzdary quttyqtap, án-shashý arnaıdy. Sonymen qatar «Jaqsy adam -2022» nomınatsııasyna ıe bolǵan jandarǵa 1 mln teńgeniń sertıfıkaty tabys etiledi.