Jaqsylyq Úshkempirovtyń týǵan kúnine oraı eskertkishine gúl shoqtary qoıyldy
ASTANA. KAZINFORM – Búgin Astana qalasynda kúres túrlerinen qazaqtan shyqqan tuńǵysh Olımpıada chempıony, QR Eńbek sińirgen jattyqtyrýshysy Jaqsylyq Úshkempirovtiń týǵan kúnine oraı balýannyń esimi berilgen Jekpe-jek saraıynyń alańyndaǵy eskertkishine gúl shoǵyn qoıý rásimi ótti.
Іs-sharaǵa Týrızm jáne sport mınıstrliginiń ókilderi, sportshylar men jattyqtyrýshylar qatysty. QR Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy E.Myrzabosynov, Astana qalasy ákiminiń orynbasary E.Baıken balýannyń týǵan kúnine oraı eskertkishine gúl shoǵyn qoıyp, taǵzym etti.
«Qazaqtan shyqqan Tuńǵysh Olımpıada chempıony Jaqsylyq Úshkempirov atamyzdyń týǵan kúni. Bul bıik belesterdi baǵyndyrǵan ári aıtýly jeńister syılaǵan sportshylar úshin qasıetti kún. Batyrymyzdyń eskertkishine gúl shoqtaryn qoıý – Olımpıada oıyndary qarsańynda elimizdiń dańqyn órletken sportshylar qaýymyna jasalǵan qurmetimiz. Jaqsylyq atamyzdyń el sportyn damytýdaǵy ustazdyq rýhy men tabandylyǵy kókeıimizde máńgi saqtalady, tipti sportshylarymyzdy jańa belesterdi baǵyndyrýǵa shabyttandyrary anyq. Bizdiń olımpıadashylarymyz bıyl da erlik jolyn jalǵap, jeńiske jeterine úmitim zor. Olımpıada dańqyna tuńǵysh dańǵyl jol salǵan Jaqsylyq atamyzdyń salyp ótken sara joly sportshylarymyzǵa dańǵyl jol bolsyn, olar el mereıin arttyrsyn. Biz jeńisti joldy esh umytpaımyz!» - dep atap ótti komıtet tóraǵasy E.Myrzabosynov.
Eske sala keteıik, Qazaqtan shyqqan tuńǵysh Olımpıada chempıony, QR Eńbek sińirgen jattyqtyrýshysy, sport sańlaǵy Jaqsylyq Ámiráliuly Úshkempirov 1951 jyly 6 mamyrda Jambyl oblysynyń Sverdlovsk aýdany Dıhan aýylynda dúnıege kelgen.
Sanaly ǵumyryn sportqa arnaǵan palýan grek-rım kúresimen shuǵyldanyp, 1971 jyly sport sheberi, 1975 jyly halyqaralyq sport sheberi atanǵan. 1980 jyly Máskeýde ótken baıraqty básekede qazaqtan shyqqan tuńǵysh Olımpıada chempıony atansa, 1981 jyly álem chempıony atanǵan.
