Jaqsybek Qulekeev Joldaý týraly: Qarjy tapshylyǵy bar ekeni ras
ASTANA. KAZINFORM – Belgili ekonomıst, memleket qaıratkeri Jaqsybek Qulekeev Prezıdent Joldaýynyń negizgi tezısteri týraly pikir bildirdi.
«Bul bıýdjetti talqylaýdyń aldyndaǵy dástúrli Joldaý ǵoı. Sondyqtan, kóterilip otyrǵan taqyryptyń kóbi negizinen áleýmettik-ekonomıkalyq problemalardy sheshýge arnalǵan. Aıaǵynda qaýipsizdik máselesine biraz toqtaldy.
Prezıdent bul joldaýyn qarjynyń tapshylyǵynan bastaǵanyn kórdińizder. Ondaı problema bar ekeni ras. Osy problemany qalaı sheshýge bolatynyn kóterdi. Ony sheshýdiń birden-bir jolyn ózi de atap ótti. Ol – sheteldik, otandyq ınvestorlardy yntalandyrý. Prezıdent sol arqyly ǵana ekonomıkamyzdy kóterýge bolatynyn aıtty. Quqyq qorǵaý salasyndaǵy azamattarǵa da naqty tapsyrmalar berip jatyr. Sonyń ishinde ınvestorlardyń kelýine tosqaýyl qoıylmaý kerektigin basa aıtty. Ondaı tosqaýyl qoıýdy memleket jasalǵan zııan, qylmys dep qaraý kerektigin aıtyp jatyr. Sondyqtan búgin kóterilip otyrǵan máseleniń bári ekonomıkalyq, áleýmettik taqyryptardy qamtydy», - dedi ol Kazinform tilshisiniń saýalyna bergen jaýabynda
Ekonomıst kapıtal zańdastyrý baǵytyndaǵy jumystar kúsheıe túsedi degendi aıtty.
«Kapıtaldy zańdastyrý baǵytyn aıta kelip, ınvestorlardyń «altyn tizimi» týraly aıtty. Bul da osyǵan deıingi jumystardyń zańdy jalǵasy deýge bolady. Qazaqstanda qarjy taýyp, ony shetelge áketetin zaman aıaqtaldy degendi Prezıdent únemi aıtyp júr. Eger otandyq ınvestorlar tapqan qarjysyn el ekonomıkasyn damytýǵa, jumys oryndaryn ashýǵa salatyn bolsa, salyqqa tıisti tólemderin túgel aýdarsa, ondaı ınvestorlar Qazaqstannyń dosy degen ustanym bar. Sol ustanymnan memleket aınymaıtyny osy Joldaýda da aıtyldy», - dedi sarapshy.
