Jaqsybek Qulekeev pen Maraltaı Raıymbekuly Jambyl oblysynyń Qurmetti azamaty atandy

Jambyl oblystyq máslıhatynyń kezekten tys, segizinshi sessııasynda «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Qazaqstan Respýblıkasynyń 2001 jylǵy 23 qańtardaǵy Zańynyń 6 baby 1 tarmaǵynyń 12-1) tarmaqshasyna jáne Jambyl oblystyq máslıhatynyń sheshimine sáıkes, birqatar azamattar «Jambyl oblysynyń Qurmetti azamaty» atandy.

Olardyń qatarynda aqyn Maraltaı Raıymbekuly, memleket qaıratkeri Qulekeev Jaqsybek Ábdirahmetuly, ǵalym Ázimhan Ábilqaıyruly Satybaldın bar, dep habarlaıdy Kazinform.

Aıta keteıik, sessııa otyrysynyń kún tártibinde 3 másele qaraldy. Onyń birinshisi – oblystyq máslıhattyń 2021 jylǵy 13 jeltoqsandaǵy «Taraz qalasyndaǵy qaýipsizdikti jáne jol qozǵalysy trafıgin taldaýdyń zııatkerlik júıesin engizý» jobasy boıynsha memlekettik mindettemelerdi qabyldaý týraly» №12-12 sheshimine ózgerister engizý týraly bolsa, ekinshisi – oblystyq máslıhattyń 2022 jylǵy 14 jeltoqsandaǵy «2023-2025 jyldarǵa arnalǵan oblystyq bıýdjet týraly» №23-3 sheshimine ózgerister engizý máselesi.

Sessııada qaralǵan úshinshi másele boıynsha joǵaryda atalǵan jáne ózge de birqatar azamatqa «Jambyl oblysynyń Qurmetti azamaty» ataǵy berildi.

Buǵan deıin Berik Jamalbekov Jambyl oblysy boıynsha memkirister departamentin basqaratynyn habarlaǵan bolatynbyz.