Jaqsy jol – elge jora

ASTANA. KAZINFORM – Ómirdiń bir ózegi – jol. Muny aıtýymyzdyń sebebi, halyqtyń taǵdyr-talaıynyń bir parasy jolmen kelip toǵysady. Osy rette jazýshy, halyqaralyq «Alash» syılyǵynyń, «Qurmet» ordeniniń ıegeri Januzaq Aıazbekovtiń jol týraly oıtolǵamyn nazarlaryńyzǵa usynamyz. 

Jaqsy jol — elge jora. Yrys-nesibemizdiń kemdiginiń bir ushy osy jolda jatyr. Shyndyǵy sol, ulan-ǵaıyr dalamyzdaǵy tozǵan joldyń azabynan alystaǵy aǵaıynǵa jete almaı, qatynasy úzilip pushaıman halge túsetin jaǵdaılarǵa áli kúnge deıin kýámiz. Sondyqtan ultymyzdyń ishki tutastyǵy men birligin, uıystyrýdyń qaınar kózi osy barys-keliske, baqýatty tirliktiń kózi alys-beriske atústi qaramaǵanymyz abzal. 

Memleket basshysy Býrabaıdaǵy Ulttyq quryltaıda sóılegen sózinde Úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrǵanyn aıtqan edi. Salynatyn jańa kúre jol ortalyq jáne batys aımaqtardyń arasyn 560 shaqyrymǵa qysqartatyny da kóńilge qýanysh uıalatady. Bul tutas Torǵaı óńiriniń damýyna jol ashady. 

Qýantarlyǵy, óńir halqynyń uzaq jyldardan beri kútken arman-tilegi oryndalyp, eki ortadaǵy baılanys odan saıyn jaqsara túsedi. Ásirese júk tasymaly men saýda-sattyqtyń joly keńeıedi. Bul ár otbasynyń turmysyna qut-bereke, úlken ózgeris ákeleri sózsiz. Bir sózben aıtqanda, turmysqa dúr silikinis beretin qadamǵa aınalady. Ári memlekettiń damýyna tyń serpin beredi.

Astanamyzdan Arqalyǵymyz, tarıh tunǵan Torǵaıymyz arqyly Batys jurtymyzǵa dańǵyl tóte jol salynyp, el ıgiligin kórse, halyqtyń kósegesin kógertti degenniń bir jarqyn kórinisi sol bolmaq.