«Jaqsy kún bolsyn, Donald»: Masktyń daýly jazbasy jeliden óshirildi

ASTANA. KAZINFORM — Mıllıarder Ilon Mask AQSh prezıdenti Donald Tramppen araqatynasy nasharlaǵannan keıin, eki kún buryn jarııalaǵan jazbasyn óziniń paraqshasynan óshirip tastady, dep jazady DW.

Mask sol jazbasynda: «Men shynymen de úlken bomba tastadym» degen.

— Donald Tramp — Epshteın faıldarynda bar. Bul — olar nege áli kúnge deıin jarııalanbaǵanynyń shynaıy sebebi. Jaqsy kún bolsyn, Donald! — delingen jazbada.

Bul jazba áleýmettik jelilerde kóptegen skrınshot arqyly saqtalyp qalǵan.

Aıta keteıik, amerıkalyq bankır Djeffrı Epshteın adam saýdasy men kámeletke tolmaǵandardy jynystyq qanaýǵa tartý aıyptary boıynsha 2019 jyly qamaýǵa alynǵan edi. Alaıda ol sotqa deıin túrmede óz-ózine qol jumsap, qaıtys boldy. Іs materıaldarynda AQSh-tyń burynǵy prezıdentterin qosa alǵanda, kóptegen tanymal tulǵanyń esimderi atalady. Degenmen, qujattardyń basym bóligi áli qupııa saqtalyp otyr.

Buǵan deıin Mask ózi basshylyq etpek bolǵan jańa amerıkalyq partııaǵa ataý usyndy. Onyń ózine tıesili X áleýmettik jelisinde ótken saýalnamada 5,6 mıllıon adamnyń 80 paıyzdan astamy Mask usynǵan America Party («Amerıka» partııasy) ataýyn qoldaǵan.

Aıta keteıik, Trampqa Ilon Maskty AQSh-tan shyǵaryp jiberýge keńes berilgenin jazdyq.

Buǵan deıin Ilon Mask Donald Tramptyń zań jobasyn ashyq synǵa alǵan bolatyn.

Tramp pen Masktyń jarııa qaqtyǵysynan keıin olardyń aktsııalary qunsyzdandy.