«Jaqsy adamdarym»: Jyl boıy el júreginen oryn alǵan azamattar marapattaldy
ASTANA. KAZINFORM – Astanada Beıbitshilik jáne kelisim saraıynda «Jaqsy adam – 2025» arnaıy syılyǵynyń saltanatty marapattaý rásimi ótti. Dástúrli marapatty QR Prezıdentiniń Teleradıokesheni quramyndaǵy Jibek Joly telearnasy uıymdastyrdy. Bıyl joba tórtinshi ret ótkizildi.
«Jaqsy adam» arnaıy syılyǵy jyl saıyn adal eńbegimen, janashyr isimen, azamattyq ustanymymen erekshelengen jandarǵa tabystalady. Bıyl «Jumysshy mamandyqtar jyly» aıasynda el damýyna únsiz úles qosyp júrgen 7 azamat marapattaldy. Laýreattarǵa dıplom, músinshe jáne 1 mıllıon teńge kóleminde qarjylaı syılyq berildi.
Ot ishinen adam alyp shyqqan batyr — Talǵat Músirát
Shyǵys Qazaqstan oblysy Zaısan aýdanynda bolǵan órt kezinde sharýa qojalyǵynyń basshysy Talǵat Músirát óz ómirin qaterge tigip, tútinge tunshyǵyp jatqan úıge kirgen. Ol qart áıel men 4 balany aman alyp shyqty. Qutqarýshylar kelgenge deıin áreket etken azamattyń bul erligi el ishinde úlken rezonans týdyrdy. Adam ómirin birinshi orynǵa qoıǵan batyldyǵy úshin Talǵat Músirát «Jaqsy adam — 2025» syılyǵyna ıe boldy.
Daýylǵa moıymaǵan meteorolog — Petr Lýpenkov
Petr Ivanovıch Lýpenkov — Kaspıı teńizindegi Kýlaly aralynda ornalasqan gıdrometeorologııalyq stantsııanyń basshysy. Ol 30 jyldan astam ýaqyt boıy ekstremaldy jaǵdaıda qyzmet etip keledi. Toqsanynshy jyldary stantsııany saqtap qalý úshin ǵımaratty otynǵa bólshektep áketýden qorǵaǵan, talaı qıyndyqty bastan ótkergen maman óz isine adaldyqtyń úlgisin kórsetti. Osy eńbegi úshin ol arnaıy syılyqpen marapattaldy.
Aıta keteıik, Petr Lýpenkov belgili sebeptermen marapattaý rásimine qatysa almaýyna baılanysty sertıfıkatty onyń ornyna «Qazgıdromet» RMK Gıdrologııa departamenti Gıdrologııalyq monıtorıng basqarmasynyń basshysy Qýanyshbek Qaýkenov aldy.
Ana men bala ómirin aman saqtaǵan dáriger — Gúlmıra Maǵzumova
Akýsher-gınekolog Gúlmıra Áýezhanqyzy Maǵzumova — elimizde jatyrishilik qan quıý operatsııalaryn júrgizetin biregeı maman. Ol uryqtyń aýyr patologııalaryn erte anyqtap, joǵary tehnologııalyq medıtsınany praktıkaǵa engizdi. Myńdaǵan otbasyǵa úmit syılaǵan eńbegi úshin dáriger «Jaqsy adam — 2025» ataǵyna laıyq dep tanyldy.
Aqqýdy ajaldan arashalaǵan aýyl turǵyny — Baýyrjan Jaqypov
Pavlodar oblysy Baıanaýyl aýdanynda Baýyrjan Jaqypov ákesimen birge muzǵa qatyp qalǵan aqqýlardy qutqaryp qaldy. Tabıǵatqa janashyrlyq tanytqan bul áreket áleýmettik jelide keńinen taralyp, kópshiliktiń yqylasyna bólendi. Janýarlarǵa degen qamqorlyǵy úshin ol arnaıy syılyq ıegeri atandy.
Eki mıllıon aǵash ekken qart baǵban — Bektaı Súleımenov
Qyzylorda oblysynyń turǵyny, 86 jastaǵy Bektaı Súleımenov ómiriniń 60 jylyn orman sharýashylyǵyna arnaǵan. Ol 2 mıllıonnan astam aǵash otyrǵyzyp, zeınetke shyqqan soń da týǵan jerin kógaldandyrýdy toqtatpaǵan. Tabıǵatty qorǵaýdaǵy ólsheýsiz eńbegi úshin ardager «Jaqsy adam — 2025» syılyǵyna ıe boldy.
40 jyl jedel járdemde júrgen feldsher — Gúlzada Ábdiǵalıeva
Gúlzada Makıetqyzy Ábdiǵalıeva jedel járdem salasynda 40 jyl boıy úzdiksiz qyzmet atqaryp keledi. Ol kez kelgen jaǵdaıda durys sheshim qabyldap, talaı jannyń ómirin saqtap qaldy. Medıtsınadaǵy adal eńbegi men meıirimi úshin arnaıy syılyq tabystaldy.
Taý men tabıǵattyń shynaıy janashyry — Tımýr Hasenov
Almatylyq belsendi Tımýr Hasenov birneshe jyldan beri Alma-Arasan shatqalyn qoqystan tazalaýdy ádetke aınaldyrǵan. Onyń bastamasy ekologııalyq qozǵalysqa ulasyp, eriktilerdi biriktirdi. Qorshaǵan ortany qorǵaýdaǵy belsendiligi úshin ol «Jaqsy adam — 2025» syılyǵyna ıe boldy.
Saltanatty is-sharaǵa memleket jáne qoǵam qaıratkerleri, Parlament depýtattary men mádenıet ókilderi qatysty.
Marapattaý rásiminiń tolyq nusqasy jańa jyl qarsańynda Jibek Joly telearnasynyń efırinen kórsetiledi.