Jaqynda shekaralyq aýmaqtardy damytý týraly arnaıy zań jobasy daıyn bolady
ASTANA. KAZINFORM — Májilis depýtaty Erlan Saırov shekara mańyndaǵy aýdandardy damytýǵa qatysty pikir aıtty.
— El Prezıdenti Qasym-Jomart Toqaev Býrabaıda ótken Ulttyq quryltaıda Úkimetke depýtattarmen birge «AMANAT» partııasy usynǵan shekara mańyndaǵy aýdandardy damytýǵa qatysty jańa zań qabyldaý bastamasyn jan-jaqty qarastyrýdy tapsyrdy. Bul — óte mańyzdy mindet. Óıtkeni, memlekettik shekara — el táýelsizdigi men egemendiginiń basty belgisi. Ony kózdiń qarashyǵyndaı qorǵaý, babadan qalǵan ulan baıtaq jerimizdi basy bútin keler urpaqqa amanattaý — ortaq paryzymyz. Bul rette, Qazaqstannyń aýmaqtyq tutastyǵyn saqtaýda shekaralyq aýdandardyń strategııalyq mańyzy zor. Qazirgi tańda Qazaqstannyń 14 oblysy kórshiles 5 elmen (Reseı, Qytaı, Ózbekstan, Qyrǵyzstan jáne Túrkimenstan) shektesedi. Shekaralyq aımaqtarda 65 aýdan bar. Onda 3,5 mln adam turady. Al shekaranyń túbinde, ıaǵnı shekaradan 50 shaqyrymdyq aralyqta 1,7 mln halyq turatyn 1 283 eldi meken ornalasqan, — dedi E. Saırov Úkimet basshysynyń atyna joldaǵan saýalynda.
Onyń aıtýynsha, kezinde júrgizilgen aýdandardy biriktirý, klımattyń qolaısyzdyǵy, jumyssyzdyq, kólik qatynasynyń nasharlyǵy, áleýmettik jáne ınjenerlik ınfraqurylymnyń tozýy jáne basqala sebepten búginde 65 shekara mańyndaǵy aýdannyń 40-ynda halyq sany azaıyp ketken. Ásirese, bul jaǵdaı Soltústik Qazaqstan, Qostanaı, Pavlodar, Shyǵys Qazaqstan oblystarynda anyq baıqalyp otyr. Osyǵan baılanysty Memleket basshysynyń tikeleı bastamasymen Shyǵys Qazaqstan, Abaı oblystarynda Qaton-Qaraǵaı, Marqakól, Tarbaǵataı, Maqanshy aýdandarynyń ashylýy óte oryndy is bolǵanyn atap ótken jón. Sonymen birge, Prezıdenttiń tapsyrmasyna sáıkes, osy kezge deıin daıyndalǵan óńirlerdi damytýǵa baǵyttalǵan birqatar memlekettik strategııalyq qujattar men baǵdarlamalarda da shekaralyq aýmaqtarǵa qoldaý kórsetý sharalary qamtylǵan.
— Degenmen, osy qujattarda qarastyrylǵan shekaralyq eldi mekenderge berilýi tıis jeńildikter áli de is júzine aspady. Bul shekaralyq aýdandarǵa qatysty kózdelgen memlekettik qoldaý tetikteriniń túrli normatıvtik aktilerde shashyrap ketýine, olardy úılestiretin jaýapty ýákiletti organnyń bekitilmeýine, memlekettik sýbsıdııalardy bólýde jáne ulttyq jobalardy iske asyrýda belgili bir sanattarǵa naqty basymdyqtardyń belgilenbeýine baılanysty bolyp otyr. Sonyń saldarynan shekaralyq aýdandardaǵy birqatar eldi mekenderden turǵyndardyń jappaı kóshýi tolastamaı tur. Bul óz kezeginde shekara mańyndaǵy aýmaqtardyń bos qalyp, ulttyq ári aýmaqtyq qaýipsizdiktiń álsireýine alyp kelýde. «Bos jatqan jer jaý shaqyrady» degen. Sondyqtan bul mańyzdy máselege jiti nazar aýdaryp, ony tıimdi sheshý joldaryn shuǵyl qarastyrǵanymyz jón, — dedi depýtat.
Onyń sózine qaraǵanda, elimizdiń shekaralyq qaýipsizdigin qamtamasyz etý, shekaralyq aýdandarda halyqtyń turaqtaýyn yntalandyrý, ishki kóshi-qondy retteý jáne eńbek resýrstaryn tıimdi paıdalaný úshin shekaralyq aýdandarǵa arnaıy mártebe berýdi kózdeıtin «Qazaqstan Respýblıkasynyń shekaralyq aýmaqtaryn damytý týraly» arnaıy zań qabyldaý óte mańyzdy.
— Bul zań qabyldansa, el aýmaǵyn tıimdi paıdalanýǵa, shekaralyq aýdandardy memlekettik qoldaý sharalaryn bir júıege túsirýge, halyqtyń shekaralyq aýmaqtarda turaqtanýyna, óńirdiń damýyna jáne aýmaqtyq qaýipsizdigimizdi qamtamasyz etýge zor serpin beredi. Osy rette, «AMANAT» partııasy jaqyn arada Memleket basshysynyń tapsyrmasyna sáıkes atalǵan zań jobasyn daıyndap, usynatynyn málimdeımiz, — dedi ol.
Budan buryn habarlanǵandaı, shekaradan 50 shaqyrym qashyqtyqta jatqan eldi mekenderde jumys isteıtin azamattardyń aılyǵyna 50 paıyz ústemaqy qosylyp, eńbek ótili ózgeshe eseptelýi múmkin.