Jaqynda qabyldanatyn mańyzdy zańdar: Prezıdent, Quryltaı, Halyq Keńesi, Astananyń mártebesi
ASTANA. KAZINFORM — Jaqyn arada birqatar mańyzdy zań jobasy Parlament qaraýyna engiziledi. Bul týraly Májilis tóraǵasy Erlan Qoshanov málim etti.
— Aldymyzda asa mańyzdy, asa aýqymdy mindetter tur. Keshe Prezıdent Konstıtýtsııany iske asyrý jónindegi sharalar týraly Jarlyqqa qol qoıdy. Shyndap kelgende, bizdiń negizgi jumysymyz endi bastalady. Depýtattar korpýsy qysqa merzim ishinde konstıtýtsııalyq ózgeristerdi zańnamalyq turǵydan bekitýdi qamtamasyz etýi kerek. Jaqyn arada birqatar zań jobasy Parlament qaraýyna engiziledi. Prezıdent, Quryltaı, Halyq Keńesi, Astananyń mártebesi jáne elimizdiń ákimshilik-aýmaqtyq qurylysy týraly jańadan bes konstıtýtsııalyq zań qabyldaımyz, — dedi Erlan Qoshanov Májilistiń jalpy otyrysynda.
Onyń aıtýynsha, sonymen birge Parlament taǵy segiz konstıtýtsııalyq zań men 60-tan astam túrli zańdarǵa túzetý engizedi.
Aıta keteıik, 17 naýryzda Memleket basshysy Qasym-Jomart Toqaev Qazaqstan Respýblıkasynyń Konstıtýtsııasyna jáne «2026 jylǵy 15 naýryzda qabyldanǵan Qazaqstan Respýblıkasynyń Konstıtýtsııasyn iske asyrý jónindegi sharalar týraly» Jarlyqqa qol qoıdy.
