Jaqyn arada «Samuryq-Qazyna» jańa tóraǵasy taǵaıyndalady — Bektenov
ASTANA. KAZINFORM — Premer-mınıstr, «Samuryq-Qazyna» AQ Dırektorlar keńesiniń tóraǵasy Oljas Bektenov Qor basshylyǵyna qatysty sońǵy oqıǵalarǵa túsinikteme berdi. Onyń aıtýynsha, jaqyn arada Qor basqarmasynyń jańa tóraǵasy taǵaıyndalady, al quqyq qorǵaý organdary jekelegen laýazymdy tulǵalarǵa qatysty tergeý júrgizip jatyr.
Oljas Bektenovtiń málimdeýinshe, qazir quqyq qorǵaý organdary jekelegen laýazymdy tulǵalarǵa qatysty tergeý áreketterin júrgizip jatyr. Іstiń barlyq mán-jaıy tergeý barysynda anyqtalady. Bul rette Prezıdent jaǵdaıdy baqylaýynda ustap otyr.
Premer-mınıstr quzyretti organdar tergeýdi zań talaptaryn saqtaı otyryp, obektıvti ári jan-jaqty júrgizýge tıis ekenin atap ótti.
Onyń sózinshe, qazirgi jaǵdaı naqty bir oqıǵaǵa qatysty. Sondyqtan ony Qordyń búkil kompanııalar tobynyń jumysyna kúmán keltirýge negiz retinde qarastyrýǵa bolmaıdy.
Bektenov jaqyn arada «Samuryq-Qazyna» AQ Basqarmasynyń jańa tóraǵasy taǵaıyndalatynyn aıtty. Basshylyq aýysqanyna qaramastan, basqarý sabaqtastyǵy men Qor jumysynyń úzdiksizdigi saqtalady.
Qorǵa qarasty barlyq kompanııa shtattyq rejımde jumys istep jatyr. Investıtsııalyq jáne ınfraqurylymdyq jobalar bekitilgen jospar boıynsha jalǵasady. Qordyń damý strategııasy da ózgermeıdi.
Sondaı-aq ınvestorlar, kredıtorlar, bankter jáne halyqaralyq qarjy ınstıtýttary aldyndaǵy barlyq qarjylyq, sharttyq jáne boryshtyq mindetteme ýaqytynda ári tolyq oryndalady.
Premer-mınıstr oryn alǵan jaǵdaı korporatıvtik basqarýdy jetildirýdi jáne sybaılas jemqorlyq táýekelderiniń aldyn alý sharalaryn kúsheıtýdi talap etetinin aıtty.
Osyǵan baılanysty Qordyń jáne enshiles uıymdarynyń dırektorlar keńesteri men olardyń janyndaǵy komıtetterdiń, ásirese aýdıt jáne táýekelderdi basqarý komıtetteriniń rólin arttyrý kózdelgen.
Іshki baqylaý, komplaens jáne ishki aýdıt tetikteri de qaıta qaralady. Sybaılas jemqorlyqtyń aldyn alý, múddeler qaqtyǵysyn anyqtaý, sheshimderdiń ashyqtyǵyn arttyrý jáne basshylardyń jeke jaýapkershiligin kúsheıtýge basymdyq beriledi.
— Bizdiń mindetimiz tek naqty quqyq buzýshylyqtarǵa den qoıýmen shektelmeıdi. Eń bastysy, mundaı jaǵdaılardyń qaıtalanýyna jol bermeıtin tıimdi júıe qalyptastyrý, — dedi Bektenov.
Ol Qazaqstannyń halyqaralyq ınvestıtsııalyq jáne qarjy qoǵamdastyǵy úshin senimdi áriptes bolyp qala beretinin de atap ótti. Úkimet Qordyń strategııalyq baǵyty ózgermeıtinin jáne ınvestorlar men kredıtorlar aldyndaǵy mindettemeler tolyq oryndalatynyn rastady.