Jaqyn arada ǵaryshqa qazaqstandyq ushýy múmkin be
QYZYLORDA. KAZINFORM — Kazinform tilshisiniń bul suraǵyna Qyzylorda oblysy ákiminiń orynbasary, QR Prezıdentiniń «Baıqońyr» keshenindegi arnaýly ókili Qaırat Nurtaı jaýap berdi.
Spıkerdiń aıtýynsha, ǵaryshqa óz ókilin jiberý — memleket úshin, qazaq eli úshin úlken maqtanysh. Bul rette biz aspan álemine sapar shegip, ǵylymı zertteý júrgizgen Qazaqstannyń úsh ókili — Toqtar Áýbákirov, Talǵat Musabaev jáne Aıdyn Aıymbetovpen maqtanamyz. Alaıda, olardyń ornyn basatyn adam ázirge kórinbeıdi.
— Qazirgi kezde júrgizilip jatqan, josparlanyp otyrǵan ǵylymı zertteýler úshin ushyrýǵa bolar edi. Degenmen, ázirge «ǵaryshker daıyndalyp jatyr, osyndaı ýaqytta ushady» dep aıtýǵa áli erte, — dedi ol.
Aıta keteıik, 14 shildede eki reseılik ǵaryshker men NASA astronavty mingen «Soıýz MS-29» ǵarysh kemesi belgilengen orbıtaǵa shyǵyp, Halyqaralyq ǵarysh stantsııasyna (HǴS) bet aldy.
