70 jyl kútken kún týady – Tramp Kýba týraly

Arızona shtatyndaǵy Fınıks qalasynda Turning Point USA uıymynyń is-sharasynda sóılegen Tramp birqatar ózekti halyqaralyq máselelerge toqtaldy.

Iran taqyrybyn qozǵaǵan ol Tegeranmen kelisimge kelý qajettigin taǵy da atap ótip, bul qadam blokadany toqtatýǵa múmkindik beretinin aıtty.

Onyń sózinshe, «kóptegen máseleler aldyn ala kelisilgen», al baıytylǵan ýran AQSh-qa beriledi.

Ormýz buǵazy tóńiregindegi jaǵdaıǵa qatysty Tramp NATO-ny synǵa alyp, alıans kómek usynǵanymen, odan bas tartqanyn jetkizdi.

Onyń aıtýynsha, «qajetti sátte olar tıimdiligin kórsetpedi».

Sondaı-aq ol Izraıl men Lıvan arasyndaǵy ýaqytsha bitimdi «teńdessiz» dep baǵalap, «biz Lıvandy qaıtadan uly elge aınaldyramyz» dep málimdedi.

Tramp «Hezbollaǵa» qatysty jaǵdaı jaqyn arada retteledi degen úmit bildirdi.

Sonymen qatar AQSh basshysy Izraıl men Lıvan arasyndaǵy bitim AQSh pen Iran arasyndaǵy kelissózderge qatysy joq ekenin atap ótti.

Kýba máselesine toqtalǵan Tramp Venesýela prezıdenti Nıkolas Madýroǵa qarsy qabyldanǵan sharalardy eske alyp, «bul qýatty saıasat jaqyn arada 70 jyl kútken kúnge jetýge múmkindik týdyrady» dedi.

Onyń aıtýynsha, bul Kýba úshin «jańa tańnyń atýy» bolmaq.

Tramp sondaı-aq AQSh-tyń óz energetıkalyq resýrstaryna basymdyq berip otyrǵanyn aıtyp, eldegi munaı óndirý kólemi Reseı men Saýd Arabııasynyń jıyntyq kórsetkishinen asyp túsetinin jáne jýyq arada eki esege artýy múmkin ekenin málimdedi.

Buǵan deıin AQSh áskerıleri prezıdent Donald Tramp tıisti buıryq bergen jaǵdaıda Kýbaǵa qatysty yqtımal operatsııa josparyn qarastyryp jatqany habarlanǵan edi.

Sondaı-aq bıyl qańtardan beri AQSh pen Kýba arasyndaǵy qatynastardyń shıelenise túskeni aıtylǵan. Tramp ákimshiligi aralǵa munaı jetkizýdi shektep, Kýbanyń kommýnıstik bıligin saıası ózgeristerge májbúrleý baǵytyn ustanyp otyr. Qazirgi tańda eki el yqtımal ekonomıkalyq kelisim jóninde kelissózder júrgizip jatyr.

Osyǵan deıin Pentagon Kýbada áskerı operatsııa júrgizýge daıyndalyp jatqany týraly jazǵan edik.