Jaqaý Dáýrenbekovtiń «Oıdaýa» degen tolǵamdar jınaǵy jaryq kórdi
ALMATY. 13 jeltoqsan. QazAqparat /Erlik Erjanuly/ - Almatyda jazýshy, pýblıtsıst, baspager Jaqaý Dáýrenbekovtiń «Oıdaýa» dep atalatyn tolǵamdar jınaǵy jaryq kórdi. Onda qalamgerdiń ár taqyrypta jazǵan dúnıeleri - tirliktiń san taqyrybyna kóńilge túrtki bolǵan túrli sıpattaǵy oıtolǵamdary jazylǵan.
Kitaptyń betasharyndaǵy «Oıdaýa» degen óleńinde qalamger - Adamnyń oı aýlap, oı keshpeıtin kezi bar ma?! Oımen birge oıanasyń, Oımen birge turasyń, Oımen birge júresiń, Oımen birge samǵaısyń, Oımen birge ańdaısyń. Oımen jaýap izdeısiń, Oımen saýap isteısiń, Oımen birge osylaı ómir súresiń Oıyń osylaı sanaǵa serik, janyńa jubanysh bolar Oıdaýaǵa aınalady eken deıdi.
J. Dáýrenbekovtiń aıtýynsha, buǵan deıin olardyń keıbiri merzimdi baspasóz quraldarynda jarııalanyp, birqatary burynǵy jınaqtaryna engen bolatyn. Bul joly olardyń basy qosylyp, jeke jınaq bolyp toptastyrylyp otyr. Qazir oqyrmandardyń kóbi jańa tehnologııalardyń qalyptasýyna oraı kólemdi úlken shyǵarmalar oqýdy azaıtyp kele jatyr. Sondyqtan bul kitapty ómir súrý saltymyzdaǵy jańa ózgeristerge jáne oqyrmannyń talap-talǵamyna sáıkes shyǵarylyp otyr deýge bolady. Oǵan avtordyń ár jyldary jazylǵan - «Bizdiń qalada qyrandardan qyrandar kóp». «Kez-kelgen saıası anekdottyń avtory bolmasa da faktory baryn moıyndaıyq». «Ótkir anekdottyń ózi ómirlik úkim». «Aqylǵa advokattyń qajeti joq». «Bizdiń kemshilikterdi kóp biletinimiz sonsha óz kemshiligimizdi aıtýǵa ómir boıy ýaqyt jetpeıdi». «Bir memlekettiń bir memleketke aqyl aıtýy aıýdyń tyshqanǵa aqyl aıtqanymen birdeı». «Ashyq aıtý - ashyq qoǵamnyń atrıbýty, jabyq qoǵamnyń allergııasy» «Daýdyń núktesi - shyndyq» degen sııaqty oıtolǵamdary engen.
