Jahannyń jylynýy: Porttardy sý basyp, keme qozǵaltqyshtary isten shyǵýy múmkin
LONDON. QazAqparat – Jer-jahannyń jylynýy keme qozǵaltqyshtarynyń isten shyǵýyna ákeledi, al muzdyqtardyń erýine baılanysty dúnıejúzilik muhıt deńgeıiniń kóterilýinen búkil álemdegi porttardy sý basyp qalýy múmkin, dep habarlaıdy QazAqparat menshikti tilshisi.
«Brıtandyq Meterologııalyq qyzmettiń zertteýine sáıkes, shamamen 10-15 jyldan keıin Parsy shyǵanaǵy betiniń temperatýrasy 36 gradýs bolady, 38 nemese 40 gradýs bolýy da yqtımal», - dedi Ulybrıtanııa Qorǵanys mınıstrligi Klımattyń ózgerýi jónindegi bas sarapshysy general-leıtenant Rıchard Nýdjı brıtan parlamentinde sóılegen sózinde.
Onyń aıtýynsha, jahandyq jylyný nátıjesinde dúnıejúzilik muhıt temperatýrasynyń kóterilýi teńiz sýymen salqyndatylatyn keme qozǵaltqyshtary úshin ózindik «jylý kórpesine» aınalýy múmkin.
«Kemelerde qıyndyqtar týyndaýy múmkin, sebebi olarda salqyndatqysh bolmaıdy. Keme kapıtandary qazirdiń ózinde 38-40 gradýsty aıtpaǵanda, qazirgi teńiz betindegi temperatýrada qozǵaltqyshtardyń isten shyǵyp jatqanyn aıtyp jatyr», - dedi áskerı sarapshy.
Zertteýler batys antarktıkalyq muz qabatynyń jáne Grenlandııanyń muz jamylǵysynyń tez erýi nátıjesinde álemdik muhıt deńgeıi 10 metrge kóteriletinin kórsetedi. Munyń saldarynan brıtandyq porttardy sý basýy múmkin.
Foto: MOSAiC/Steffen Graupner
