Jahandyq jylynýdy toqtatý úshin 1 trln aǵash otyrǵyzý kerek - ekologtar
ASTANA. QazAqparat - Shveıtsarııa ekologtary Jer sharyndaǵy ormandy alqaptardy úsh esege arttyrý kómirqyshqyl gazyn azaıtyp, jahandyq jylynýdy toqtatýǵa kómektese alatynyn aıtady.
The Independent basylymynyń jazýynsha, ótken aptada Ǵylymdy damytý qaýymdastyǵynyń (AAAS) Vashıngtonda ótken jyl saıynǵy kezdesýinde Shveıtsarııadaǵy Tsıýrıh joǵary tehnologııa mektebiniń professory Tomas Kroýter jahandyq jylynýdy toqtatý úshin búkil álem boıynsha shamamen bir trıllıon aǵash otyrǵyzylý kerektigin málim etken.
«Búgingi tańda úsh trıllıon aǵash 400 gıgatonna kómirqyshqyl gazyn joıa alady. Al aǵashtardyń sanyn taǵy bir trıllıonǵa arttyrsaq, aǵashtar adamdardyń on jylda shyǵaratyn kómirqyshqyl gazynyń kólemine teń mólsherde aýany tazarta alatyn bolady», - deıdi doktor Kroýter. Onyń aıtýynsha, osy kúnge deıin jahandyq jylyný máselesinde aǵashtardyń róli óz baǵasyn ala almaı keledi.
«Aǵash otyrǵyzý jahandyq jylynýmen kúresý úshin tıimsiz jol sııaqty kórinedi. Degenmen, dúnıedegi eń sońǵy zertteýlerge sensek, Jer sharynda áli de 1,2 trıllıon aǵash otyrǵyzýǵa múmkindik bar. Bul aýyl sharýashylyǵy nemese qalaly jerlerdi emes, paıdaǵa aspaı, bos jatqan jerlerdi esepke alǵandaǵy zertteý», - deıdi ol.
